ლა ლიგის მე-4 ტურში „ვალენსია“ პამპლონაში „ოსასუნას“ ესტუმრა და დამაჯერებლად, 1:4 გაიმარჯვა. „ღამურების“ კარს კვლავ საქართველოს ნაკრების მეკარე, გიორგი მამარდაშვილი იცავდა, რომელმაც მთელი შეხვედრა დამაჯერებლად ჩაატარა. მართალია 20 წლის მეკარემ ერთი გოლი გაუშვა, თუმცა აღნიშნულ ეპიზოდში მისი ბრალეულობა ნაკლებადაა.
შეხვედრაში მასპინძლები მე-8 წუთზე დაწინაურდნენ. მონკაიოლამ ბრასანაჩის პასი გამოიყენა და საკუთარი გუნდი წინ გაიყვანა. ხოსე ბორდალასის გუნდმა წონასწორობა 26-ე წუთზე, მაქსი ლოპესის გოლით აღადგინა და შესვენებაზე გუნდები ფრით გავიდნენ.
„ვალენსიამ“ დაწინაურება მეორე ტაიმის დებიუტშივე შეძლო. მარცხენა ფლანგიდან გონსალო გედეშის აქტიურობას საბოლოოდ არიდანეს ავტოგოლი მოყვა. ზუსტად 5 წუთში გედეშმა მეტოქეს მესამე გოლი გაუტანა, საბოლოო ანგარიში კი 73-ე წუთზე ალდერეტემ დააფიქსირა.
ამ გამარჯვების შემდეგ მამარდაშვილის გუნდი სატურნირო ცხრილში გალიდერდა და 10 ქულით პირველ ადგილს იკავებს. „ვალენსია“ მომდევნო შეხვედრას 19 სექტემბერს, საკუთარ მოედანზე მადრიდის „რეალის“ წინააღმდეგ გამართვს.
