ავტორიტეტულმა ესპანურმა გამოცემამ, AS-მა ლა ლიგის კლუბებში მოასპარეზე 12 პერსპექტიული ახალგაზრდა ფეხბურთელი დაასახელა, რომლებსაც ქომაგებმა თვალი უნდა ადევნონ. AS-ის რჩეულთა შორის „ვალენსიას“ მეკარეს, გიორგი მამარდაშვილს ვხედავთ.
„მამარდაშვილი ვალენსიას მესამე მეკარეა, მაგრამ სილესენისა და ხაუმე დომენეკის ტრავმებმა მას გოლკიპერის ხელთათმანების მორგების საშუალება მისცა. გრანადას ქომაგებს მამარდაშვილი ლოკომოტივთან გამართული მატჩებიდან ემახსოვრებათ. გიორგის ასაკმა და მის მიერ განხორციელებულმა სეივებმა ვალენსიას ყურადღება მიიპყრო და ხეტაფეს წინააღმდეგ მატჩში მან ნდობა გაამართლა. მამარდაშვილს შესანიშნავი რეფლექსები აქვს და მარდია“, – წერს AS.
გიორგი მამარდაშვილი ვალენსიას 1-წლიანი იჯარით შეუერთდა. 20 წლის ქართველმა მეკარემ ჩინებულად ითამაშა “ღამურების” საკონტროლო მატჩებში, ყველაფერი კი ლა ლიგაში სუპერ დებიუტით დაგვირგვინდა. ხეტაფესთან გიორგიმ 4 სეივი მიითვალა, კარი მშრალად შეინახა და მოედანზე ერთ-ერთი საუკეთესო იყო.
