რუსეთის პრემიერლიგის მე-3 ტურში ხვიჩა კვარაცხელიას “რუბინმა” გროზნოს “ახმატს” 2:1 სძლია, მატჩის საუკეთესო ფეხბურთელად კი სწორედ ქართველი აღიარეს, თუმცა, სტუმართა მწვრთნელი მისმა მოქმედებამ გააღიზიანა.
ანდრეი ტალალაევმა ხვიჩას რამდენიმე ეპიზოდში სიმულანტობა დააბრალა და ისიც თქვა, რომ არბიტრი პაველ კუკუიანი მას განსაკუთრებული კეთილგანწყობით ექცეოდა. შესაბამისად, ტალალაევის აზრით, მატჩის საუკეთესო მოთამაშისთვის განკუთვნილი პრიზი ხვიჩას და არბიტრს თანაბრად ეკუთვნოდათ.
“კუკუიანი-კვარაცხელია კარგი ტანდემია. მე ჯილდოებს ორივეს გადავცემდი. მე-2 ტაიმში რუბინმა ჯარიმებით 7 ჩვენი შეტევა ჩაშალა, თუმცა, მსაჯს 1 ყვითელი ბარათიც არ უჩვენებია, კვარაცხელიაზე ჩვენი ნებისმიერი ფოლი კი გაფრთხილებით ისჯებოდა, მიუხედავად იმისა, აფორმებდა თუ არა ის. ჩვენ 10 ფეხბურთელის შემადგენლობითაც კი კარგად ვთამაშობდით. ყველა ამბობს, რომ რუბინი კარგ ფეხბურთს აჩვენებს, არადა, მათ თამაშიდან მხოლოდ ერთხელ დაგვირტყეს. ეს ღირსეული მოგება არ იყო. წავაგეთ, თუმცა, მათ გროზნოში ველით”.
