შვეიცარიის ქალაქ ნიონში უეფას ჩემპიონთა ლიგის მერვედფინალური ეტაპის წილისყრა გაიმართა.
კენჭისყრის შედეგად წყვილები ასე გადანაწილდა:
უეფას ჩემპიონთა ლიგაზე მერვედფინალური ეტაპის წყვილებს კენჭი უყარეს. ბუნებრივია, ფლეი-ოფში უინტერესო თამაში არ არსებობს, მაგრამ იქნებიან ისეთი წყვილებიც, რომელთა დაპირისპირებაც „ცეცხლოვანი“ იქნება. ასევე წილისყრამ ერთი სუპერ მატჩიც გვარგუნა – ბარსელონასა და პსჟ-ს მონაწილეობით.
მერვედფინალში არიან ისეთი გუნდები, რომლებსაც ერთმანეთთან დაპირისპირების საკმაოდ დიდი გამოცდილება აქვთ, თუმცა არიან ისეთებიც, რომლებიც ერთმანეთს ისტორიის განმავლობაში პირველად შეერკინებიან.
მოდით თვალი გადავავლოთ 1/8 ფინალში მონაწილე ყველა გუნდის ურთიერთდაპირისპირების ისტორიას.
ბორუსია მიუნხენგლადბახი – მანჩესტერ სიტი
აღნიშნული გუნდები ერთმანეთს ჩემპიონთა ლიგის ეგიდით გამართულ თამაშებში 4-ჯერ შეხვდნენ, თუმცა მანამდე იყო შორეულ 70-იან წლებში, უეფას თასზე გამართული ორი დაპირისპირება. საერთო ჯამში, გუნდებმა ერთმანეთის წინააღმდეგ 6-ჯერ ითამაშეს, 3 შემთხვევაში გამარჯვება ქალაქელებმა მოიპოვეს, ერთხელ ბორუსიამ იმარჯვა, ორიც კი ფრედ დასრულდა. ბოლოს ეს გუნდები ერთმანეთს 2016/2017 წლების სეზონში, ჩემპიონთა ლიგის ჯგუფურ ეტაპზე შეხვდნენ. პირველ მატჩი მანჩესტერელებმა 4:0 მოიგეს, მეორე შეხვედრა კი ფრედ, 1:1 დასრულდა. ამ დაპირისპირებაში აბსოლუტურ ფავორიტად ბუქმეიკერებმა მანჩესტერ სიტი შერაცხეს, თუმცა ჯგუფურ ეტაპზე, ბორუსიას გამონათებებს თუ გავიხსენებთ, ქალაქელებს ადვილი გასეირნება ნამდვილად არ ელით.
ლაციო – მიუნხენის ბაიერნი
აღნიშნული გუნდები ერთ-ერთია იმ წყვილთაგან, რომლებსაც ურთიერთშეხვედრების ისტორია არ გააჩნიათ. 17 თებერვალს, ისინი არსებობის ისტორიაში პირველად დაუპირისპირდებიან ერთმანეთს. წყვილში ფავორიტად ბუნებრივია რეკორდმეისტერი სახელდება, თუმცა დიდხნიანი პაუზის შემდეგ რომაელები ჩემპიონთა ლიგის ამ სტადიაზე პირველად იასპარეზებენ და ბუნებრივია, მოტივაციის ნაკლებობის პრობლემა არ ექნებათ. ასევე საინტერესო იქნება რობერტ ლევანდოვსკისა და ჩერო იმობილეს დუელიც.
ატლეტიკო – ჩელსი
ლონდონელებს დიეგო სიმეონეს შეგირდების წინააღმდეგ საამაყო სტატისტიკა ნამდვილად არ აქვთ. აქამდე ეს გუნდები ერთმანეთს 7-ჯერ დაუპირისპირდნენ, საიდანაც ჩელსიმ მხოლოდ 2 შეხვედრაში შეძლო მეტოქის დამარცხება, ასევე 2 შეხვედრაში გაიმარჯვა ატლეტიკომ, 3 მატჩი კი ფრედ დასრულდა. ამ გუნდებს შორის ყველაზე დასამახსოვრებელი დაპირისპირება 2012 წლის უეფას სუპერ თასზე შედგა, სადაც „როხიბლანკომ“ მეტოქე 4:1 გაანადგურა.
ლაიფციგი – ლივერპული
მერვედფინალურ ეტაპზე ერთ-ერთ ყველაზე სანახაობრივ თამაშებს ალბათ სწორედ ამ წყვილისგან უნდა ველოდოთ. საინტერესო იქნება, იულიან ნაგელსმანის და იურგენ კლოპის დუელიც. ლაიფციგი უკვე მეორე სეზონია გულშემატკივრების გაოცებას, საკმაოდ სანახაობრივი და შემტევი ფეხბურთით განაგრძობს. გასული სეზონის ნახევარფინალისტთან ფავორიტები ბუნებრივია მერსისაიდელები იქნებიან, თუმცა ლაიფციგმა არაერთხელ გვაჩვენა, რომ მათ გრანდების დამარცხება შეუძლიათ. აღსანიშნავია, რომ ლივერპული და ლაიფციგი არსებობის ისტორიაში ერთმანეთს პირველად შეხვდებიან.
პორტუ – იუვენტუსი
აღნიშნულ წყვილში უპირობო ფავორიტად ტურინელები სახელდებიან. მით უმეტეს, თუ ჩავთვლით რონალდუს სათამაშო ფორმას და მოტივაციას, პორტუგალიელებს კარგი დღე ნამდვილად არ ელით. სტატისტიკაც იუვენტუსის სასარგებლოდ მეტყველებს. აქამდე ეს გუნდები ერთმანეთს 4-ჯერ დაუპირისპირდნენ, საიდანაც სამ შემთხვევაში ტურინელებმა მოიგეს, ერთი მატჩი კი ფრედ დასრულდა.
ატალანტა – რეალი
კიდევ ერთი წყვილი, რომლებსაც ერთმანეთთან თამაშის გამოცდილება არ აქვთ, ატალანტა და მადრიდის რეალი არიან. უკანასკნელ სამ თამაშს თუ ჩავთვლით (სევილია, მიუნხენგლადბახი, ატლეტიკო), მადრიდელებს მომდევნო ეტაპზე გასვლა წესით და რიგით არ უნდა გაუჭირდეთ, თუმცა ზიდანის ფეხბურთელებმა უსახური თამაშით არაერთხელ გაგვაოცეს და ის, რომ ამ გუნდში სერიოზული პრობლემებია, ეს თითქმის ყველა თამაშში კარგად ჩანს. თავისმხრივ ატალანტა უკვე მეორე სეზონია დიდებულ სეზონს ატარებს და დაზუსტებით შეიძლება ითქვას, რომ მადრიდელებს დიდ ბრძოლას გაუჩაღებენ.
სევილია – დორტმუნდი
ეს გუნდები ერთმანეთს მხოლოდ ორჯერ შეხვდნენ, ისიც ევროპა ლიგის ჯგუფურ ეტაპზე. ერთ მატჩში ანდალუსიელებმა მინიმალური სხვაობით, 0:1 გაიმარჯვეს, მეორე შეხვედრა კი ფრედ, 2:2 დასრულდა. დღესდღეობით დორტმუნდელებს კარგი დღე ნამდვილად არ უდგათ. ბოლო ტურში ისინი შტუტგარტთან 1:5 დამარცხდნენ, რამაც მთავარი მწვრთნელის გათავისუფლება გამოიწვია, თუმცა ბუქმეიკერებისგან ფავორიტის სტატუსი მაინც მათ ერგოთ.
ბარსელონა – პსჟ
და ბოლოს, სუპერ წყვილი, რომლებსაც ბევრი წარდგენა არ სჭირდებათ. ასევე არ სჭირდება ბევრი წარდგენა ურთიერთშეხვედრებს, რადგან დარწმუნებული ვარ ის სასწაული „ქამბექი“ ყველა ფეხბურთის გულშემატკივარს კიდევ ემახსოვრება. ამ „ქამბექს“ ვერ დაივიწყებდნენ პარიზელებიც და 4 წლის შემდეგ რევანშის რეალური შანსი ეძლევათ. თუმცა, ერთი რამ უნდა აღინიშნოს. იმ სასწაულის მთავარი შემოქმედი ახლა პსჟ-ში თამაშობს და დიდი ალბათობით აღნიშნულ დაპირისპირებას გამოტოვებს. იმის მიუხედავად, რომ ბარსელონა ოპტიმალური ფორმისგან ძალიან შორსაა, ფეხბურთის ქომაგები მაინც სუპერდაპირსიპირების მოლოდინში ვართ. წინა დაპირისპირების გარდა, ბარსელონას და პსჟ-შ ერთმანეთთან თამაშის საკმაოდ დიდი გამოცდილება აქვთ. ეს გუნდები ერთმანეთს 11-ჯერ შეხვდნენ და 5 შემთხვევაში გამარჯვება ბარსელონამ მოიპოვა, 3 მატჩში პსჟ-მ გაიმარჯვა, 3-იც კი ფრედ დასრულდა.
1/8 ფინალური ეტაპის პირველი თამაშები 17 თებერვალს ჩატარდება, საპასუხო შეხვედრები კი 10 მარტს გაიმართება.
