სულ ცოტაც და ჩოგბურთის მოყვარულები ნირვანაში კიდევ ერთხელ გადაეშვებიან. როლან გაროსი ახლახანს დასრულდა, წინ კი უიმბლდონია, რომელიც სტარტს 28 ივნისს აიღებს.
მანამდე კი საკვალიფიკაციო ტურნირის დროა, სადაც ათობით ჩოგბურთელი შეეცდება ძირითადი ბადის კარი შეაღოს. ერთ-ერთი ასეთი კი ეკატერინე გორგოძეა.
გემახსოვრებათ, რომ ეკატერინე გორგოძემ პარიზში წარმატებით იასპარეზა და დიდი სლემის მთავარ ბადეში კარიერაში პირველად ითამაშა. იგივეს გაკეთებას ქართველი ჩოგბურთელი ლონდონშიც შეეცდება. საამისოდ კი პირველი ნაბიჯი უკვე გადადგა.
საკვალიფიკაციო ეტაპის პირველ წრეში ეკატერინე გორგოძემ ევა შოუ დაამარცხა. ჩვენებური მეჩოგნისთვის ბრიტანელი იოლი ლუკმა გამოდგა, რაზეც შედეგიც მეტყველებს. გორგოძემ მეტოქე მარტივად და აუღელვებლად ორ სეტში – 6:2, 6:2 დაამარცხა.
საკვალიფიკაციო ტურნირის მეორე ეტაპზე ეკატერინე გორგოძეს შედარებით რთული გამოცდა ელის. მისი მეტოქე ამერიკელი კრისტინ ანი იქნება, რომელიც რეიტინგის 118-ე ნომერია.
