პოლონეთის ქალაქი გდანსკი საოცარი ფინალის მასპინძელი გახდა. 2020/2021 წლების სეზონის ევროპა ლიგის გადამწყვეტ მატჩში „მანჩესტერ იუნაიტედი“, რომელიც წყვილის აშკარა ფავორიტად ითვლებოდა „ვილიარეალთან“ 11 მეტრიანების სერიაში წააგო.
11:10 – ასეთი გახლდათ პენალტების სერიის ანგარიში. რომ არა წითელი ეშმაკების კიპერის დეხეას გაცუდებული დარტყმა, გუნდები მეორე წრეზე წავიდოდნენ.
საბოლოოდ, „მანჩესტერ იუნაიტედმა“ ევროპა ლიგის თასი „წყალქვეშა ნავებს“ დაუთმო, ხოლო ოლე გუნარ სულშერმა ხელიდან მთავარი მწვრთნელის რანგში პირველი სერიოზული ტიტულის მოგების შანსი გაუშვა.
ცხადია, მოვლენების ამ დოზით დრამატულად განვითარების ფონზე, ძალზედ გულდაწყვეტილი იყო მანჩესტერული გრანდის თავკაცი.
„ბევრს ვერაფერს ვიტყვი. გასახდელში სრული სიჩუმეა. ეს საშინელი იმედგაცრუებაა, მაგრამ ეს არის ფეხბურთი – ერთს უხარია, მეორე დამწუხრებულია. ყველაფერს ხანდახან ერთი დარტყმა წყვეტს. ეს ჩვენთვის გაკვეთილი უნდა იყოს, რადგან მსგავსი რამ მეორედ არ დაგვემართოს“ – აღნიშნა მანჩესტერელთა ნორვეგიელმა დამრიგებელმა.
