გადაწყვეტილი ამბავია, რომ „ბენევენტო“ სერია ა-ს დატოვებს. ფილიპო ინძაგის გუნდმა წინა ტურში უკვე გავარდნილ „კროტონეს“ ვერ მოუგო და ამით ქვედა დივიზიონში დაქვეითების საგზური ოფიციალურად გამოიწერა.
სერია ა-ს ბოლო ტურში „ბენევენტოს“ თამაში სტუმრად „ტორინოსთან“ აქვს. გუნდის პრეზიდენტმა ორესტე ვიგორიტომ გადაწყვიტა მიმდინარე სეზონში უსახური თამაშის გამო, რასაც სერია ბ-ში გავარდნა მოჰყვა სასჯელის რაიმე ფორმა მოეფიქრებინა. ჰოდა, ადგა და ფეხბურთელები, მწვრთნელები და მთლიანად გუნდის სტაფი ავტობუსში გადასხა.
მოკლედ, „ბენევენტოს“ ბოლო ტურის სათამაშოდ ტურინში წასვლა ავტობუსით მოუწევს. გუნდის ბოსებმა თვითმფრინავის ბილეთების ყიდვაზე უარი თქვეს.
იტალიის სამხრეთი ნაწილიდან, სადაც ბენევენტო მდებარეობს ტურინამდე თითქმის 900 კილომეტრია. ამრიგად, ინძაგის შეგირდებს ავტობუსით დაახლოებით 12 საათიანი მგზავრობა ელით, რათა ტურინამდე ჩააღწიონ.
„ბენევენტომ“ იტალიის ჩემპიონატის უმაღლეს ლიგაში მეორე სეზონი გაატარა, ახლა კი ისევ გავარდა და დაბრუნებისთვის ბრძოლა მოუწევს.
