როგორც მოსალოდნელი იყო, ინგლისურმა „მანჩესტერ სიტიმ“ ჩემპიონთა ლიგის ჯგუფური ეტაპი თამაშ-თამაშ გაიარა და პირველი ადგილიც დაიკავა. ამაში არაფერია გასაკვირი, განსხვავებით თანაქალაქელ „მანჩესტერ იუნაიტედისგან“, რომელმაც პლეიოფში გასვლა ვერ შეძლო.
პეპ გვარდიოლას შეგირდებმა ჯგუფური ეტაპი წაუგებლად განვლეს და ქულათა მაქსიმუმამდე სულ ცოდა დააკლდათ. რომ არა, „პორტოსთან“ გასვლითი ფრე (0:0), „სიტი“ ყველა მატჩს მოიგებდა.
დასკვნით ტურში, „ქალაქელებმა“ ეტიჰადზე „მარსელი“ მიიღეს და აუღელვებლად 3:0 გადაურბინეს. გვარდიოლაც მედიასთან ყინჩად გამოიყურებოდა.
„უკმაყოფილების საბაბი არ მაქვს. ჩემმა გუნდმა ჯგუფის ყველა მატჩი უმაღლეს დონეზე ჩაატარა და საბოლოოდ თავი 16 ქულას მოვუყარეთ. არ შეიძება ამ მაჩვენებლით კმაყოფილი არ ვიყო.
ჩემპიონთა ლიგაზე ჩვენ ყველა დაპირისპირებას სრული სერიოზულობით ვუდგებით, მიუხედავად იმისა, მერვედფინალში გასვლა მანამდე გავინაღდეთ თუ არა. ასე იყო „მარსელის“ შემთხვევაში. „სიტი“ მხოლოდ ქულებისთვის ან ფულისთვის არ თამაშობს. ჩემი გუნდი ნებისმიერ მატჩს დიდი პასუხისმგებლობით ეკიდება.
„მარსელი“ საკუთარ ჩემპიონატში ერთ-ერთი ლიდერია. ამიტომაც მათთან სიფრთხილე გვმართებდა. მოხარული ვარ, რომ ჩემპიონთა ლიგაზე, 2020 წელი გამარჯვებით ჩავამთავრეთ“ – თქვა ესპანელმა სპეციალისტმა.
