პარიზულ გრანდს ფინალამდე ერთი ნაბიჯი დააკლდა. „პსჟ“ ნახევარფინალში ორი მანტჩის ჯამში „მანჩესტერ სიტისთან“ ისე დამარცხდა, რომ ორივე მატჩი წააგო. შინ წაგებული 1:2-ის შემდეგ, პარიზელები ურთულესი ამოცანის წინაშე იდგნენ, თუმცა არა უტოპიურის.
მართალია, „პსჟ“-ს განმეორებით დაპირისპირებაში კილიან მბაპე აკლდა, მაგრამ იმ უსახური თამაშის გასასამართლებლად, რაც პარიზულმა გრანდმა აჩვენა ეს ფაქტორი გამამართლებელ საბუთად ვერ გამოდგება. საბოლოოდ, „მანჩესტერ სიტიმ“ მეტოქე შინაურ კელდებშიც აუღელვებლად 2:0 დაამარცხა.
„პსჟ“-ს დამრიგებელი მოურიციო პოჩეტინო მატჩის შემდეგ ბუნებრივია გულგატეხილი და იმედგაცრუებული იყო.
„მანჩესტერ სიტის მინდა მივულოცო. ეს გუნდი მართლაც არაჩვეულებრივ სეზონს ატარებს. ფეხბურთში იღბალიც აუცილებელია. მატჩი კარგად დავიწყეთ, თითქოს ვდომინირებდით და უპირატესობასაც ვფლობდით, რაც „სიტის“ დონის გუნდის წინააღმდეგ მარტივი არ არის.
მართალია ბურთს ვაკონტროლებდით და მომენტებსაც ვქმნიდით, თუმცა გოლი ვერ გავიტანეთ, მეტოქე კი უფრო ეფექტური აღმოჩნდა. მათ თავიანთი შანსი გამოიყენეს.
რაც შეეხება კილიან მბაპეს, ის ჩვენთვის მნიშვნელოვანი ფიგურა და დიდი ძალაა, თუმცა ამ მარცხს თავის გასასამართლებლად ვერ გამოვიყენებთ“ – აღნიშნა „პსჟ“-ს არგენტინლმა მთავარმა მწვრთნელმა.
