აღდგომის ბრწყინვალე დღესასწაულზე, სპორტის და განსაკუთრებით შერეული ორთაბრძოლების ქართველმა გულშემატკივრებმა, ოკეანისგაღმიდან მშვენიერი საჩუქარი მიიღეს. ორმა ჩვენებურმა სპორტსმენმა – გიგა ჭიკაძემ და მერაბ დვალიშვილმა UFC VEGAS 25-ის ეგიდით გამართულ ბრძოლებში ბრწყინვალე გამარჯვებები მოიპოვეს.
UFC-ის ისტორიაში პირველად მოხდა, რომ ერთ დღეს ოქტაგონზე ტოპ 15-ის ორი ქართველი მებრძოლი გავიდა და სასიხარულოა, რომ თავი არ შეირცხვინეს და დიდებულად იასპარეზეს.
გიგა ჭიკაძემ, ამერიკელი მეტოქე კაბ სვანსონი ოქტაგონიდან გააქრო და საქმე ერთ წუთში მოუმთავრა, როდესაც მოწინააღმდეგე ნოკდაუნში გაუშვა.
„დღეს საქართველოში აღდგომის ბრწყინვალე დღესასწაულს აღნიშნავენ. მე და მერაბმა ამ გამარჯვებით ჩვენი სამშობლო და ქართველი ხალხი გავახარეთ, რითიც უზომოდ ბედნიერები ვართ.
მსურს საქართველოს მთავრობას მივმართო – ვფიქრობ, სპორტის ამ სახეობის წარმომადგენლები მეტ ყურადღებას ვიმსახურებთ“ – აღნიშნა გიგა ჭიკაძემ გამარჯვების შემდეგ კომენტარში.
