რაღა დარჩა, ორი თვეც და ზაფხულის სატრანსფერო მიდი-მოდი ოფიციალურად გაჩაღდება. ფეხბურთის გულშემატკივარი ალბათ არაერთ საინტერესო და მნიშვნელოვან ტრანსფერს იხილავს, თუმცა ეჭვგარეშეა, რომ ქართველი ქომაგების ყურადღება მხოლოდ ხვიჩა კვარაცხელიასკენ იქნება მიმართული.
20 წლის ქართველი ტალანტი აქამდეც არაერთ გუნდს დაუკავშირეს და უცხოურმა გამოცემებმაც კვარაცხელია ამა თუ იმ გრანდში გადაიყვანეს. რა თქმა უნდა, ჯერ გადაჭრით რაიმეს თქმა ან მტკიცება ნაადრევია, თუმცა იმაში ეჭვი არ გვეპარება, რომ ხვიჩა სეზონის ბოლოს ყაზანის „რუბინს“ აუცილებლად დატოვებს.
ამასობაში, რამდენიმე იტალიური გამოცემა წერს, რომ ხვიჩა კვარაცხელიასთვის ბრძოლაში „იუვენტუსი“ დაწინაურდა და ტურინული კლუბი მზად არის „რუბინს“ 20 მილიონი ევრო გადაუხადოს.
„21-ე საუკუნეში დაბადებული ქართველი ფეხბურთელი იუვენტუსის მთავარი სამიზნეა. ტურინულ გუნდს მასში საკმაოდ სოლიდური თანხის – 20 მილიონი ევროს გაღებაც არ ენანება. როგორც ვიცით, ის თავის ქვეყანაში 2020 წლის საუკეთესო ფეხბურთელად დასახელდა. თუ იუვენტუსი კვარაცხელიას ტრანსფერს განახორციელებს, მაშინ ის გუნდის ისტორიაში პირველი ქართველი ფეხბურთელი გახდება“ – წერს Juventusnews24.
კიდევ ერთი იტალიური გამოცემა ilgazzettino კი აღნიშნავს, რომ „იუვენტუსს“ კვარაცხელიას ტრანსფერის რაც შეიძლება მალე დასრულება სურს.
„ის ორივე ფეხით ერთნაირად კარგად თამაშობს და ნამდვილი ტალანტია. იუვენტუსსაც სწორედ ამიტომ სურს, კვარაცხელიას ტრანსფერს წერტილი რაც შეიძლება მალე დაუსვას. 16 წლის იყო, როდესაც თბილისის „დინამოში“ მისი დებიუტი შედგა და ალბათ ძალიან ახლოს არის ის დრო, როდესაც ხვიჩა კვარაცხელია პირველი ქართველი ფეხბურთელი გახდება, რომელიც იუვენტუსუს მაისურს მოირგებს“.
