ეროვნული ლიგის მეშვიდე ტური „თელავის“ და ბათუმის „დინამოს“ დაპირისპირებით დაიხურა. მატჩი ძალზედ საინტერესოდ წარიმართა და ზღვისპირელთა გამარჯვებით 2:1 დასრულდა.
მიუხედავად უგოლო პირველი ტაიმისა, მეორე ნახევარში გუნდებმა ლაღი ფეხბურთი გააჩაღეს და გულშემატკივარმაც 3 გოლი იხილა.
თელაველები პირველ ტურში „სამტრედიის“ დამარცხების შემდეგ, აგერ უკვე ზედიზედ 6 მატჩია ვეღარ იგებენ, ხოლო ბათუმელებმა მიჯრით ორი ფრეს, როგორც იქნა აქტივს 3 ქულაც შეჰმატეს.
გია გეგუჩაძის შეგირდთაგან გოლები ჯამბულ ჯიღაურმა და სანდრო ალთუნაშვილმა გაიტანეს და თავისი გუნდი სოლიდურად დააწინაურეს, თელაველთაგან კი თავი რატი არდაზიშვილმა გამოიჩინა.
ბათუმელები 15 ქულით სატურნირო ცხრილში მეორე ადგილზე არიან და მომდევნო მატჩს 12 აპრილს შინ „სამგურალის“ წინააღმდეგ გამართავენ. რაც შეეხებათ თელაველებს, კახური გუნდი 6 ქულით მერვე ადგილზეა და წინ გორის „დილასთან“ ჯახი ელით.
