რაღა დაღჩა. 4 თვეც და ტოკიოში, რიგით 32-ე ზაფხულის ოლიმპიური თამაშები აიღებს სტარტს. არახალი ამბავია, რომ ოთხწლეულის ყველაზე გრანდიოზული სპორტული ფორუმი შარშან ზაფხულში უნდა გამართულიყო, მაგრამ პანდემიის გამო ერთი წლით გადაიდო, თუმცა სახელი შეინარჩუნა და ისევ „ტოკიო 2020“ იქნება.
წინ სხვადასხვა სპორტის სახეობაში არაერთი სალიცენზიო ტურნირია, რომელთაგან ერთ-ერთი 18 აპრილს იაპონიის დედაქალაქში უნდა დაწყებულიყო. საუბარია წყალში მხტომელთა მსოფლიო თასის გათამაშებაზე, რომელზეც ამავდროულად ოლიმპიადის ლიცენზიებიც ნაწილდება.
ტურნირი გაურკვეველი ვადით გადაიდო. მიზეზი მკაცრი რეგულაციებია. მსოფლიო თასზე 80- მდე ქვეყნის სპორტსმენებს უნდა მიეღოთ მონაწილეობა და მათ შორის 3 ქართველ წყალში მხტომელს, თუმცა ბევრმა პროსტესტის ნიშნად ტოკიოში ჩასვლა არ ისურვა.
-ტოკიოში 12 აპრილს მივფრინავდით. მსოფლიო თასზე, რომლის მთავარი დატვირთვაც ოლიმპიადის ლიცენზიების გათამაშებაა 3 სპორტსმენით უნდა გამოვსულიყავით. ესენი არიან ჭოლა ჭანტურია, სანდრო მელიქიძე და თორნიკე ონიკაშვილი, მაგრამ გადაიდო – გვითხრა წყალში მხტომელთა ნაკრების ერთ-ერთმა მწვრთნელმა და საერთაშორისო კატეგორიის არბიტრმა ირაკლი ბართაიამ, როდესაც ინტერვიუსთვის შევეხმიანეთ.
-მიზეზი რა იყო?
-თავად ტოკიო თავისთავად ტურნირის უმაღლეს დონეზე სამასპინძლოდ მზად იყო, თუმცა ძალზედ მკაცრი რეგულაციებით ჩატარებას გეგმავდნენ.
ბილეთებიც ნაყიდი გვქონდა და როგორც იტყვიან უკვე ჩემოდნებზე ვიჯექით, როდესაც საწყლოსნო სახეობათა მსოფლიო ფედერაციამ მოგვწერა აღარ ჩამოხვიდეთო. როგორც აგვიხსნეს, ქვეყნების უმეტესობა წინააღმდეგია ასეთი მკაცრი და ველური რეგულაციების პირობებში ტურნირში მონაწილეობაზე და ჩვენც იძულებული ვართ დროებით გადავდოთო.
– ტურნირს ისევ ტოკიო უმასპინძლებს?
-არა, ეს უკვე გამორიცხულია. მსოფლიო თასის გათამაშება რომელიმე სხვა ქვეყანაში გაიმართება. სავარაუდოდ მაისის თვეში. დეტალებს 15 აპრილის შემდეგ გვაცნობებენ.
-ეს ყველაფერი ჩვენ გუნდზე როგორ იმოქმედებს?
-რომ გითხრათ დადებითადთქო მოგატყუებთ. რა თქმა უნდა, ფსიქოლოგიურად ადვილი არ არის, როდესაც ერთი და იგივე ტურნირი უკვე მეორედ ჩაიშლება. თან ისიც არ დაგვავიწყდეს, რომ წყალში ხტომაში ეს ერთადერთი სალიცენზიო შეჯიბრია.
-როგორც ვიცით, ევროპის ჩემპიონატიც მოახლოვდა.
-დიახ, მართალი ხართ. კონტინენტის პირველობა 7 მაისს ბუდაპეშტში იწყება და ჩვენც ისღა დაგვრჩენია ამ მნიშვნელოვანი შეჯიბრისთვის მოვემზადოთ.
-რამდენი სპორტსმენით აპირებთ გამოსვლას და რას უნდა ველოდოთ?
-ბუდაპეშტის „დუნაი არენაზე“ იგივე შემადგენლობით წარვსდგებით, როგორც ტოკიოში ვაპირებდით. პროგნოზებს რაც შეეხება, ვეცდებით მაქსიმალურად დამაჯერებლად ვიასპარეზოთ. ახლა რეიტინგით ჩვენი ნაკრები ევროპაში მერვეა და კარგი იქნება თუ გავაუმჯობესებთ.
აქვე იმასაც გეტყვით, რომ მე ევროპის ჩემპიონატზე, როგორც საერთაშორისო კატეგორიის მსაჯი ისე ვარ მიწვეული.
