ბრატისლავის „სლოვანმა“ სეზონისთვის მზადება დაიწყო. გუნდს ქართველი ახალწვეულები, გურამ კაშია და ჯაბა კანკავაც შეუერთდნენ.
საქართველოს ნაკრების ვიცე-კაპიტანმა და კაპიტანმა მცირე ხნის წინ ერთწლიანი კონტრაქტები გააფორმეს „სლოვანთან“, რომელიც ახლახან „ჯვაროსნების“ ყოფილმა მთავარმა მწვრთნელმა ვლადიმირ ვაისმა ჩაიბარა.
ბრატსლავის „სლოვანმა“ პირველი ამხანაგური მატჩი ობერვარტში ავსტრიულ „კაპფენბერგერთან“ გამართა და 4:1 დაამარცხა. ვლადიმერ ვაისმა მეორე ტაიმში ძირითადი შემადგენლობა შეცვალა და მოედანზე გურამ კაშია და ჯაბა კანკავა შემოუშვა. კანკავამ 54-ე წუთზე ეფექტური შეტევა წამოიწყო, რომელიც მისმა თანაგუნდელმა გოლით დაასრულა.
„სლოვანი“ მომდევნო მატჩს ხუთშაბათს, 24 ივნისს რუსულ „ორენბურგთან“ გამართავს, 26 ივნისს კი ავსტრიულ „ადმირა ვაკერს“ დაუპირისპირდება.
ქართველების გუნდი სლოვაკეთის ჩემპიონია. „სლოვანი“ ჩემპიონთა ლიგის პირველ საკვალიფიკაციო ეტაპზე ირლანდიის ჩემპიონს, „შემროკ როვერსს“ შეხვდება. ვაისის გუნდი პირველ მატჩს 7 ივლისს საკუთარ მოედანზე გამართავს, საპასუხო მატჩი კი 14 ივლისს ჩატარდება.
