ფეხბურთის გულშემატკივარი სასწაული დაპირისპირების მომსწრე გახდა და ვინც თვალი მიადევნა ნამდვილად არ ინანებდა. ინგლისის თასის 1/8 ფინალში, „ევერტონმა“ და „ტოტენჰემმა“ სპექტაკლთან ერთად თრილერიც დადგეს, რომელშიც გამარჯვებული ლივერპულელები გამოდგნენ.
„გუდისონ პარკზე“ 9 გოლი გავიდა და „ევერტონმა“ ლონდონელებს 5:4 მოუგო. „ტოტენჰემს“ საქმეები კარგად ვერც პრემიერლიგაში მისდის და ალბათ თასიდან გამოვარდნაც მძიმე ტვირთად დააწვება. აქვე ისიც ვთქვათ, რომ ინგლისის თასის ისტორიაში ბოლო 60 წლის მანძილზე ასეთი უხვგოლიანი მატჩი აღარ ყოფილა.
ჟოზე მოურინიო წაგებით იმედგაცრუებულია, თუმცა იხტიბარს არ იტეხს და მომავალს იმედით გაჰყურებს.
„ეს ნამდვილი კატა-თაგვობანა იყო. ამ მატჩს სხვა სიტყვებს ვერ მივუსადაგებ. მოედანზე განვითარებულმა მოვლენებმა ორმაგი განცდა დამიტოვა – თან მომეწონა და თან არა.
ბურთს ხშირად ვაკონტროლებდით, ვქმნიდით მომენტებს, გოლებიც გავიტანეთ, მაგრამ მაინც დავმარცხდით. 4 გოლის მიუხედავად წაგება მეტად გულდასაწყვეტია. როდესაც ამ რაოდენობის გოლს იტანს, ვალდებული ხარ მოიგო, თუმცა სამწუხაროდ ასე არ მოხდა.
მტკივნეული მარცხია. ჩემი გუნდი თავდაჯერებული თამაშობდა, მაგრამ შემდეგ იყო ის 5 წუთიანი მონაკვეთი. შეცდომა, შეცდომა და კიდევ შეცდომა, რამაც საბოლოოდ მატჩის შედეგზე უდიდესი გავლენა მოახდინა.
როგორც ავღნიშნე ამ მატჩს კატა-თაგვობანას შევადარებდი. თაგვი ჩვენი შეცდომები იყო, ხოლო კატა თავად ჩვენ“ – აღნიშნა „ტოტენჰემის“ მთავარმა მწვრთნელმა ჟოზე მოურინიომ.
