რაღა დარჩა. სულ ცოტაც და საქართველოს ეროვნული ნაკრები მსოფლიო ჩემპიონატის შესარჩევ ციკლში ჩაებმება. პირველი მეტოქეც საკმაოდ სერიოზულია – შვედეთი, რომელიც 25 მარტს სტოქჰოლმში დაგვიხვდება.
ჯვაროსნების მთავარი მწვრთნელის რანგში დებიური ექნება ვილი სანიოლის, თუმცა ეს ყველაფერი არ არის. ეროვნულ გუნდში არაერთი ახალწვეულია, მათ შორის საფრანგეთში დაბადებული და ამჟამად ბელგიურ „სერენსში“ მოთამაშე ჟორჟ მიქაუტაძე.
არ არის გამორიცხული, ახალგაზრდა ნიჭიერმა ფეხბურთელმა ეროვნული ნაკრების მაისური უკვე შვედეთთანაც მოირგოს. ვნახოთ, რა გადაწყვეტილებას მიიღებს ვილი სანიოლი.
მანამდე კი ვნახოთ რას ამბობს თავად ჟორჟ მიქაუტაძე, რომელიც ნაკრებში გამომგზავრებამდე ბელგიურ მედიას ესაუბრა.
„არჩევანის გაკეთებაზე ბევრი არ მიფიქრია. რა თქმა უნდა, შემეძლო საფრანგეთის ნაკრები ამერჩია, მაგრამ უპირატესობა საქართველოს მივანიჭე. თან შემდეგ უკვე ვილი სანიოლიმაც დამირეკა და გადაწყვეტილების მიღებაც აღარ გამჭირვებია.
ახლა მხოლოდ იმაზე ვფიქრობ საქართველოს ნაკრებს გამოვადგე და ქომაგებს იმედები არ გავუცრუო. ეს ჩემთვის დიდი პატივია. იმედი მაქვს ამ 3 თამაშში თავს კარგად წარმოვაჩენთ და ქულების აღებას შევძლებთ“ – ამბობს ჟორჟ მიქაუტაძე.
