ლეო მესის წასვლა კატალონიურმა გრანდმა ოფიციალურად დაადასტურა, რომ არგენტინელ ფეხბურთელთან ახალი კონტრაქტის გაფორმება შეუძლებელია.
დღეს “ბარსას’ პრეზიდენტმა ჟოან ლაპორტამ პრესკონფერენცია გამართა, სადაც მესის წასვლის მიზეზებზე დეტალურად ისაუბრა.
ჟოან ლაპორტა
“ორი დღის წინ გადავწყვიტე, რომ ასე გაგრძელება აღარ შეიძლებოდა. გუშინ ლეოს მამასთან ბოლო საუბარი გვქონდა. მოლაპარაკება ძალიან ინტენსიური გამოვიდა, რთული და ბევრი დეტალით დატვირთული საუბარი შედგა.
ლა ლიგასთან რომ შევთანხმებულიყავით, ხელფასის თვალსაზრისით 50 პროცენტით მეტის გადახდის საშუალება გვექნებოდა, მაგრამ მივიღებდით კონტრაქტებს, რომლებსაც მერე ვეღარ გავწყვეტდით. 15 აგვისტოს რეალ სოსიედადს ვეთამაშებით და გადაწყვეტილების მიღება უკვე ძალიან სასწრაფო იყო. თავიდან ვფიქრობდით, რომ მესის თემა ივლისის ბოლოს ამოიწურებოდა და ყველაფერი ჩვენს სასარგებლოდ დასრულდებოდა.
ამჟამინდელი სიტუაცია იმაზე ცუდია, ვიდრე ველოდით. აუდიტის შედეგები ამას ადასტურებს.
არ ვფიქრობ, რომ მომხდარი ჩემი ბრალია. მე მხოლოდ იმას ვამბობდი, რომ მესის ბარსელონაში დასატოვებლად ყველაფერს გავაკეთებდით – ფინანსური შესაძლებლობების ფარგლებში. როგორც განცხადებაშიც წაიკითხეთ, ჩვენ მივაღწიეთ შეთანხმებას, მაგრამ Salary-Cap-ლიმიტის გამო კონტრაქტის გაფორმება შეუძლებელი გახდა. ვისი ბრალია, ის რაც მოხდა? არ მინდა იმ არასწორ გადაწყვეტილებებზე საუბარი, რაც ადრე იქნა მიღებული. ამჟამინდელი სიტუაცია იმაზე ცუდია, ვიდრე ველოდით. აუდიტის შედეგები ამას ადასტურებს. თამამად შემიძლია იმის თქმა, რომ მესისთან მოლაპარაკებები კარგად მიდიოდა.
მან ისტორია დაწერა, ის კლუბის ისტორიაში ყველაზე წარმატებული ფეხბურთელია და მისი სახელი ბარსას ყველაზე დიდ წარმატებებს უკავშირდება. ახლა ახალი ერა იწყება. მესიმ ჩვენ ბევრი სიხარული და ტიტული მოგვცა. ლეომ ძალიან ბევრჯერ დაამტკიცა, რომ ბარსა უყვარს. ძალიან ვწუხვარ, რომ უნდა დაგვტოვოს, მაგრამ დარწმუნებული ვარ, რომ ბარსელონასთვის საუკეთესო გადაწყვეტილება იქნა მიღებული.”
ლეო მესიმ ლა-ლიგაში 520 მატჩში 474 გოლი გაიტანა, ჩემპიონთა ლიგის 149 შეხვედრაში კი 120 გოლის გატანა შეძლო. მან ბარსელონაში ოთხჯერ მოიგო ჩემპიონთა ლიგა, 10-ჯერ გახდა ესპანეთის ჩემპიონი და შვიდჯერ დაეუფლა ესპანეთის თასს. ლეო ბოლოს ზედიზედ ხუთჯერ გახდა ესპანეთის ჩემპიონატის საუკეთესო ბომბარდირი.
