თბილისის “დინამოს” ლეგენდარულ მოთამაშეს, ვიტალი დარასელიას 65 წელი შეუსრულდებოდა.
ვიტალი დარასელია თბილისურ კლუბში 17 წლის ასაკში ჩაირიცხა და მალე დაიმკვიდრა ადგილი გუნდის ძირითად შემადგენლობაში. დარასელია “დინამო თბილისის” და საბჭოთა კავშირის ნაკრების შეუცვლელ ფიგურად იქცა. “დინამოში” 1975 წლიდან 1982 წლამდე იასპარეზა და 273 შეხვედრაში 40 გოლი გაიტანა. მისი როლი ძალიან დიდია “დინამოელთა” მიერ მოპოვებულ დაუვიწყარ გამარჯვებებში. დარასელიას საფეხბურთო კარიერის გვირგვინად უეფას თასების მფლობელთა თასის ფინალურ შეხვედრაში, კარლ ცაისის კარში გატანილი გადამწყვეტი გოლი იქცა, რომელიც “დინამოს” ისტორიაში ყველაზე მნიშვნელოვან გოლად არის მიჩნეული. ვიტალი იყო სსრკ– ს ჩემპიონი 1978 წელს, ვერცხლისმედალოსანი 1977 წელს, სამგზის პრიზიორი 1976 წლის გაზაფხულსა და შემოდგომაზე და 1981 წელს. ბროლის თასის ორგზის მფლობელი 1976 და 1979 წლებში. უეფას თასების მფლობელთა თასის მფლობელი 1981 წელს, 33 საუკეთესო ფეხბურთელთა სიაში 5- ჯერ დაასახელეს.
ვიტალი დარასელია 1982 წლის 13 დეკემბერს, 25 წლის ასაკში, ავტოკატასტროფაში ტრაგიკულად დაიღუპა.
შეგახსენებთ, რომ “დინამო თბილისის” საფეხბურთო აკადემია ლეგენდარული ვიტალი დარასელიას სახელს ატარებს.
