გუშინ, ჩემპიონთა ლიგის პირველი საკვალიფიკაციო ეტაპის მატჩში, თბილისის „დინამოსა“ და ბაქოს „ნეფთჩის“ შეხვედრის დასრულების შემდეგ სტადიონზე რამდენიმე ინციდენტი მოხდა.
სტადიონზე შეკრებილმა გულშემაკტივრების ნაწილმა კლუბის „პრეზიდენტის“, რომან ფიფიას გადადგომა ღიად მოითხოვა. რამდენიმე ქომაგმა „დინამოს“ მენეჯმენტის წარმომადგენლებს არაკორექტული სიტყვებით მიმართა, რასაც მცირე დაპირისპირებაც მოყვა.
ეს არ ყოფილა ერთადერთი ინციდენტი. როდესაც კლუბის წარმომადგენლები სტადიონს ტოვებდნენ, გულშემატკივრები მათ „დინამო არენას“ მიმდებარე ტერიტორიაზეც დახვდნენ და საკუთარი მოთხოვნები კიდევ ერთხელ დააფიქსირეს, რასაც ასევე მენეჯმენტის წარმომადგენლების გაღიზიანება მოყვა. ინციდენტის ამსახველი კადრები სოციალურ ქსელში გავრცელდა.
შეგახსენებთ, რომ ჩემპიონთა ლიგის ჯგუფური ეტაპის პირველი საკვალიფიკაციო ეტაპის პირველი შეხვედრა თბილისის „დინამოსა“ და ბაქოს „ნეფთჩის“ შორის სტუმართა გამარჯვებით, 1:2 დასრულდა. საპასუხო შეხვედრა 14 ივლისს, ბაქოში გაიმართება.
