მსოფლიოს 2022 წლის ჩემპიონატის შესარჩევი ეტაპის მეორე ტურში ხორვატიის ნაკრებმა პირველი სამი ქულა მოიპოვა. სლოვენიაში ცოტა არ იყოს მოულოდნელი მარცხის შემდეგ, ხორვატებმა კვიპროსს უმასპინძლეს და მინიმალური სხვაობით – 1:0 აჯობეს.
ეს მატჩი ისტორიული გამოდგა ლუკა მოდრიჩისთვის. მადრიდის „რეალის“ და ხორვატიის ნაკრების ნახევარმცველმა რეკორდი დაამყარა. მან ეროვნული ნაკრების მაისური ოფიციალურ შეხვედრებში 135-ედ მოირგო. ხორვატიის ნაკრების შემადგენლობაში ამდენი მატჩი არავის არასდროს ჩაუტარებია.
35 წლის მოდრიჩის დებიუტი ხორვატიის ნაკრებში 2006 წელს შედგა და მან გუნდთან ერთად არაერთ მსხვილ ტურნირზე ითამაშა. 2018 წლის მუნდიალზე კი სულაც ფინალში გავიდა.
ლუკა მოდრიჩს ეროვნული ნაკრების რიგებში 16 გოლი აქვს გატანილი.
