დღეს, საქართველოს კალათბურთელთა ნაკრები მსოფლიო ჩემპიონატის საკვალიფიკაციო ეტაპის მეორე ტურში სტუმრად ესპანეთის ნაკრებს დაუპირისპირდება.
ქართველმა კალათბურთელებმა მატჩამდე ბოლო ვარჯიში გუშინ გამართეს, რომლის დასრულების შემდეგაც ჩვენი გუნდის ცენტრმა, გიორგი შერმადინმა მოახლოებულ შეხვედრაზე ისაუბრა.
„გუნდში ძალიან კარგი განწყობაა. უკრაინასთან თბილისში ძალიან მნიშვნელოვანი თამაში მოვიგეთ. რაც შეეხება ესპანეთთან მატჩს, გუნდის თითოეულმა მოთამაშემ ვიცით, თუ როგორი მნიშვნელოვანი იქნება ამ შეხვედრაში გამარჯვება. ასევე, ყველამ ძალიან კარგად ვიცით, რომ ესპანეთი ძალიან ძლიერი გუნდია და ძალიან კარგი მოთამაშეებითაა დაკომპლექტებული. ამ მოთამაშეების უმრავლესობა ესპანეთის ჩემპიონატში თამაშობს, რომელიც ევროპაში ერთ-ერთი საუკეთესოა. ვფიქრობ, კარგი თამაში გამოვა და ვიმედოვნებ, ჩვენი გამარჯვებით დასრულდება“, – განაცხადა გიორგი შერმადინმა.
შეგახსენებთ, რომ ილიას ზუროსის გუნდმა მსოფლიო ჩემპიონატის საკვალიფიკაციო ეტაპის პირველი მატჩი თბილისის სპორტის სასახლეში, 26 ნოემბერს უკრაინის ნაკრების წინააღმდეგ გამართა და მეტოქე 5 ქულის სხვაობით, 88:83 დაამარცხა.
რაც შეეხება დღევანდელ შეხვედრას, ის საქართველოს ნაკრების კაპიტნის, თორნიკე შენგელიას გარეშე ჩაივლის, რომელსაც უკრაინის ნაკრებთან მიღებული ტრავმა გაუმიზეზდა. მატჩი თბილისის დროით 23:30 საათზე დაიწყება.
