პეკინის ზამთრის ოლიმპიური თამაშების მეცამეტე საშეჯიბრო დღეს მოციგურავე ქალებმა თავისუფალი პროგრამა წარმოადგინეს და მედლებიც გაინაწილეს.
საქართველოს წარმომადგენელმა ანასტასია გუბანოვამ თავისუფალი პროგრამა უშეცდომოდ შეასრულა და მსაჯებისგან მისთვის საუკეთესო – 135.58 ქულიანი შეფასება მიიღო. იქამდე კი გუბანოვას საუკეთესო მაჩვენებელი (134.41) Finlandia Trophy-ის 2021 წლის ტურნირზე ჰქონდა.
საქართველოს ნაკრების წევრმა ორი დღით ადრე მოკლე პროგრამა 65.40 ქულით და მეათე შედეგით დაასრულა. მეათე შედეგი აჩვენა დღესაც. აი, ორივე პროგრამის ჯამში კი 200.98 ქულა დააგროვა და პეკინის თამაშებზე გამოსვლა მეთერთმეტე ადგილით დაასრულა. გუბანოვამ მაღალი ოსტატობა და ბრძოლის უნარი გამოავლინა და ჩვენი ქვეყანა ღირსეულად წარმოადგინა ზამთრის ოლიმპიადაზე.
შეგახსენებთ, რომ რამდენიმე დღით ადრე მარია კაზაკოვასა და გიორგი რევიას წყვილმა ყინულზე ცეკვებში მე-19 ადგილი დაიკავა. კაცთა ერთეულებში მეათე შედეგით დაასრულა ასპარეზობა მორის ყვითელაშვილმა, გუნდურში კი, სადაც საქართველოს ნაკრებს დებიუტი ჰქონდა, მეექვსე ადგილი დავიკავეთ.
