რამდენიმე დღის წინ, ჰოლანდიურმა მედიამ გაავრცელა ინფორმაცია, რომ ამსტერდამის „აიაქსის“ ფეხბურთელი კუინსი პრომესი სამართალდამცავებმა დააკავეს და მას 4 წლიანი პატიმრობა ემუქრებოდა. მოგვიანებით, პრესაში დაზარალებულის ფოტოც გავრცელდა, რომლის ცივი იარაღით დაჭრასაც პრომესს ედავებიან.
დღეს კი ირკვევა, რომ კუინსი პრომესი თავისუფალია. უფრო სწორად მან საპატიმრო გირაოთი დატოვა და სამართალდამცავების მეთვალყურეობის ქვეშ იქნება, თუმცა ეჭვმიტანილის სტატუსი ბოლომდე არ მოუხსნიათ.
„ამ ეტაპზე, ის მტკიცებულებები რაც მოგვეპოვება არ იძლევა იმის საშუალებას ის პატიმრობაში დავტოვოთ. ფეხბურთელი თავისუფალია, თუმცა კვლავ ეჭვმიტანილად ითვლება. გამოძიება გრძელდება“ – ნათქვამია ამსტერდამის პროკურატურის განცხადებაში.
ფეხბურთელის გათავისუფლებას გამოეხმაურა „აიაქსის“ ტვიტერის გვერდიც. „ის საწვრთნელ პროცესს დაუბრუნდა“ – ნათქვამია მოკლე შეტყობინებაში.
