სერბი არბიტრი სრჯანა ობრადოვიჩი 15 თვეს საპატიმროში გაატარებს. ამბავი 2018 წელს მოხდა, თუმცა სასამართლო პროცესები 3 წელი გაიწელა და საბოლოო განაჩენიც ახლა გახდა ცნობილი.
საქმე სერბეთის ჩემპიონატის მატჩს ეხება, რომელშიც სუბოტიცის „სპარტაკი“ საკუთარ მოედანზე „რადნიჩკოვს“ ეთამაშებოდა. დაპირისპირებას უდიდესი პრინციპული მნიშვნელობა ჰქონდა, რადგან ამ მატჩში გამარჯვებული ევროპა ლიგის საგზურს იპოვებდა.
მატჩი მასპინძლების გამარჯვებით – 2:0 დასრულდა. ორივე გოლი „სპარტაკმა“ 11 მეტრიანის ნიშნულიდან გაიტანა. სკანდალის მიზეზიც სწორედ ეს ფაქტი გახდა, რომელიც საბოლოოდ მსაჯის დაპატიმრებით დასრულდა.
ობრადოვიჩის მიერ დანიშნული პენალტებიდან, განსაკუთრებით საეჭვო მეორე გახლდათ. არბიტრმა ჩათვალა, რომ მცველს ბურთი საჯარიმოში ხელზე მოხვდა. ამას გარდა, ობრადოვიჩმა სტუმართა ფორვარდი მილან პავკოვა გააძევა, რომელსაც რამდენიმე წუთის ინტერვალში ორი ყვითელი ბარათი აუფრიალა. სასამართლო პროცესებზეც ერთ-ერთი მთავარი მოწმე სწორედ მილან პავკოვა გახლდათ.
სასამართლომ მიიჩნია, რომ სრჯანა ობრადოვიჩმა თავისი მდგომარეობა ბოროტად გამოიყენა, რითიც სხვას ზიანი მიაყენა და მას 15 თვით გისოსებს მიღმა ყოფნა მიუსაჯა. გარდა ამისა, ობრადოვიჩს 10 წლის მანძილზე აეკრძალა არა მხოლოდ თავისი პროფესიით საქმიანობა, არამედ საერთოდ ფეხბურთთან კავშირი.
