ტოკიოს ოლიმპიურ თამაშებზე წარმატებული სტარტი აიღო ნიკოლოზ ბასილაშვილმა. ქართველი ჩოგბურთელი ოლიმპიურ ტურნირზე ორგანიზატორებმა მე-14 ნომრად განთესეს და პირველ წრეშიც ისეთი მეტოქე ერგო ფავორიტად რომ თავად იყო შერაცხული.
ესპანელი რობერტო კარბალეს ბაენას დაკნინება ნამდვილად არ გვსურს, თუმცა ისიც ფაქტია, რომ რეიტინგშიც და ოსტატობითაც ჩვენებური მეჩოგნე გაცილებით მაღლა დგას და ეს მატჩის მიმდინარეობამაც გამოაჩინა. აქვე ისიც დავძინოთ, რომ კარბალეს ბაენა, რომელიც მსოფლიოს 90-ე ჩოგანია, ტოკიოში რაფაელ ნადალის მაგივრად მოხვდა, რადგან ესპანელმა მატადორმა ბევრი ფიქრის შემდეგ ოლიმპიადაზე ასპარეზობა მაინც იუარა.
ნიკოლოზ ბასილაშვილმა წყვილში ფავორიტის სტატუსი გაამართლა და მეტოქეს ორ სეტში – 6:3, 6:2 აჯობა. მიუხედავად ანგარიშისა, ბასილაშვილს მთლად იოლი გასეირნებაც არ გამოსვლია. რიგ ეპიზოდებში ნერვები ღალატობდა და მარტივ შეცდომებს უშვებდა, თუცმა მთავარი ხომ ტაბლოა და საბოლოოდ იქ ქართველი ჩოგბურთელის გამარჯვება დაფიქსირდა.
მეორე წრეში ნიკოლოზ ბასილაშვილის მეტოქე იტალიელ ლორენცო სონეგოსა და იაპონელ ტარო დანიელს შორის გამარჯვებული იქნება.
