ქუთაისის „ტორპედოს“ ახალი მთავარი მწვრთნელი ჰყავს. უფრო სწორად, ქუთათურებს კარგად ნაცნობი დამრიგებელი დაუბრუნდა. აბა, ქუთაისური კლუბისთვის კახა ჩხეტიანი უცხო კაციაო ნამდვილად ვერ ვიტყვით.
იყო დრო და არც ისე შორეულ წარსულში, გამოცდილი სპეციალისტის ხელში „ტორპედომ“ საქართველოს მასშტაბით უმაღლეს შედეგებს რომ მიაღწია და ქვეყნის ჩემპიონი გახდა. ქუთათურებს არც ევროსარბიელზე შეურცხვენიათ თავი და ევროპა ლიგის ჯგუფურ ეტაპამდე ერთი ნაბიჯი დააკლდათ, როდესაც პლეიოფში ბულგარულ „ლუდოგორეცთან“ წააგეს.
ფეხბურთის მოყვარულთ ალბათ შეხსენება არ უნდა სჭირდებოდეს, რომ კახა ჩხეტიანი „ტორპედოდან“ შარშან წამოვიდა და მუშაობა თბილისის „დინამოში“ დაიწყო, თუმცა ამ თანამდებობაზე დიდხანს ვერ „გაქაჩა“ და გუნდიდან მალევე დაითხოვეს. უფრო ზუსტნი რომ ვიყოთ, ჩხეტიანი ქართული ფეხბურთის ფლაგმანის თავკაცობიდან თავად გადადგა, როდესაც მისმა გაწრთვნილმა „დინამომ“ წინა ჩემპიონთა ლიგის საკვალიფიკაციო ეტაპის პირველივე წრეში ალბანურ „ტირანასთან“ წააგო და გათამაშებას გამოეთიშა.
მას შემდეგ კახა ჩხეტიანი უმუშევარი გახლდათ. ამიერიდან კი ის კვლავ მშობლიური ქუთაისის „ტორპედოს“ მთავარი მწვრთნელი იქნება.
