პრემიერლიგის ტურის ცენტრალური დაპირისპირება ლონდონში შედგა, სადაც „ჩელსიმ“ შინაურ არენაზე „მანჩესტერ იუნაიტედს“ უმასპინძლდა და უგოლო ფრით გაეყარა.
მატჩის შემდეგ შედეგით ნაწილობრივ კმაყოფილი ჩანდა არისტოკრატთა მთავარი მწვრთნელი ტომას ტუხელი, რომლის „ჩელსიში“ მოსვლიდან ლონდონელებმა თამაშის ხარისხი მნიშვნელოვნად გააუმჯობესეს.
„მთავარი ამოცანა ოთხეულში მოხვედრა და ჩემპიონთა ლიგის საგზურის მოპოვებაა. საამისოდ თითოეულ მატჩს და ქულას შესაძლოა გადამწყვეტი მნიშვნელობაც ჰქონდეს. დღეს რომ გვემარჯვა მიზნის მისაღწევად დიდ ნაბიჯს გადავდგამდით, მაგრამ ისიც ვიცოდით, რომ ამის გაკეთება გაგვიჭირდებოდა.
დღეს, გულშემატკივარმა ორი ძლიერი გუნდის დაპირისპირება იხილა. თავს კარგად ვიცავდით, მეორე ტაიმში კი შეტევებსაც ვუმატეთ და გოლის გატანის რამდენიმე კარგი შანსი მოგვეცა.
გამარჯვებისკენ ვისწრაფვოდით. იგივეს ცდილობდა მეტოქეც. საბოლოოდ, ვფიქრობ ფრე ლოგიკური შედეგი იყო“ – თქვა „ჩელსის“ დამრიგებელმა პრესკონფერენციაზე.
