9 მაისს, ტოკიოში ზაფხულის ტურნირი – ნაცუ ბაშო იწყება, რომელშიც ჩვენებური ლევან გორგაძე, იგივე ტოჩინოშინიც მიიღებს მონაწილეობას.
არც ისე შორეულ წარსულში, იმპერატორის თასის მფლობელი ქართველი სუმოისტი ძველი ფორმისგან და დიდებისგან შორს არის, თუმცა ამასაც აქვს თავისი ობიექტური მიზეზი. ტოჩინოშინი ხშირად ტრავმიანობდა, რაც მის შედეგებზეც თავისთავად უარყოფითად აისახა.
ლევან გორგაძემ ოძეკის წოდება კი დაკარგა, თუმცა ბაშოებზე ხელწამოსაკრავი მეტოქე არავისთვის არის და არაერთი ხმაურიანი გამარჯვებებიც მოუპოვებია. ჯერ მარტო უძლეველი ჰაკუჰოს დამარცხება რად ღირს.
მოკლედ, წინ ნაცუ ბაშოა და სუმოს ქართველ ქომაგებსაც იმედი აქვს, რომ ლევან გორგაძე მეტ-ნაკლებად წარმატებით იასპარეზებს.
ლევან გორგაძემ წინა ბაშოზე დაფიქსირებული უარყოფითი ბალანსის მიუხედავად ბანძუკეში ადგილი უცვლელად შეინარჩუნა და აღმოსავლეთის მე-7 მაეგაშირაა, ხოლო ნაცუ ბაშოს პირველ დღეს იჩინოჯის დაუპირისპირდება.
ქართველი და მონღოლი სუმოისტი ერთმანეთს 25-ჯერ დაპირისპირებიან და აქედან 17-ჯერ დოჰიო გამარჯვებულმა ტოჩინოშინმა დატოვა.
რაც შეეხება ლევან გორგაძის მეორე მეტოქეს, ის იაპონელი მე-8 მაეგაშირა ცურუგიშო იქნება, რომელსაც ქართველი ფალავანი აქამდე არასდროს შეხვედრია.
