იაპონიის დედაქალაქ ტოკიოში ოლიმპიური თამაშების ჩატარება კვლავ საფრთხის წინაშე დგას. ქვეყნის მმართველი პარტიის გენ. მდივანმა, ტოსიჰირო ნიკაიმ სპეციალურ ბრიფინგზე განაცხადა, რომ თუ იაპონიაში ეპიდემიოლოგიური მდგომარეობა უკეთესობისკენ არ შეიცვლება, ტოკიოს ოლიმპიური თამაშები შესაძლოა საბოლოოდ გაუქმდეს.
პარალელურად, საერთაშორისო ოლიმპიური კომიტეტი დაჟინებით ამტკიცებს, რომ ოლიმპიადის გამართვას საფრთხე არ ემუქრება, იაპონიის მთავრობა კი საპირისპირო ინფორმაციას ავრცელებს:
„იმ შემთხვევაში, თუ ოლიმპიადის ჩატარება სპორტსმენებისთვის უსაფრთხო არ იქნება, სამწუხაროდ, ოლიმპიური თამაშების გაუქმება მოგვიწევს. დღევანდელი მონაცემებით ამისი პროგნოზირება რთულია. რატომ უნდა ჩატარდეს ოლიმპიადა, თუ ეს ინფექციის გავრცელების ეპიცენტრი იქნება?! ვიმედოვნებთ, რომ მტკივნეული გადაწყვეტილების მიღება არ მოგვიწევს“, – განაცხადა ტოსიჰირო ნიკაიმ.
შეგახსენებთ, რომ ტოკიოს ოლიმპიადა თავდაპირველად გასული წლის ზაფხულში უნდა გამართულიყო, თუმცა კორონავირუსის პანდემიის გამო ზუსტად 1 წლით გადაიდო. ოლიმპიური თამაშები მიმდინარე წლის 23 ივლისიდან, 8 აგვისტომდე უნდა ჩატარდეს.
