შაბათს, 7 აგვისტოს ტოკიოს ოლიმპიურ თამაშებზე საქართველოს დელეგაციის 2 წევრი იასპარეზებს და ამით, ჩვენი დელეგაციის წარმომადგენლები ტოკიოში მიმდინარე ოლიმპიადას დაასრულებენ.
მედლის მოპოვებას, კარატისტი გოგიტა არქანია და თავისუფალი სტილით მოჭიდავე ელიზბარ ოდიკაძე შეეცდებიან.
ცნობილია, გამომსვლელების დრო და მეტოქეთა ვინაობა:
გოგიტა არქანია 09:00 საათიდან
არქანია ასპარეზობას A ჯგუფში დაიწყებს. ქართველ კარატისტს, 5 სპორტსმენთან მოუწევს შეხვედრა და თუ ის ორ საუკეთესო კარატისტს შორის მოხვდა, ნახევარფინალის საზგურს მოიპოვებს.
ნახევარფინალში გასვლა, ავტომატურად ნიშნავს ბრინჯაოს მედალს. ჯგუფური ეტაპის შეხვედრები 09:00-დან დაიწყება, ნახევარფინალური 14:37-ზე, ფინალი კი 15:05-ზე აიღებს სტარტს.
ელიზბარ ოდიკაძე 13:45 საათიდან
ელიზბარ ოდიკაძე (97 კგ) ბრინჯაოს მედლისთვის იბრძოლებს. ქართველმა ფალავანმა რეპეშაჟში გადაინაცვლა და ხალიჩაზე 7 აგვისტოს ისევ გავა.
ოდიკაძეს დამამშვიდებელ წრეში მონაწილეობის უფლება მას მერე ერგო, რაც აბდულრაშიდ სადულაევი ფინალში გავიდა და ქართველს მედლისთვის ბრძოლის შანსი ამგვარად მიეცა.
ოდიკაძე რეპეშაჟის ნახევარფინალში აზერბაიჯანელ შარიფ შარიფოვს შეხვდება.რეპეშაჟის პირველ შეხვედრაში გამარჯვების შემთხვევაში, ოდიკაძე ბრინჯაოს მედლისთვის კუბელ რეინერის სალას პერესს დაუპირისპირდება. რეპეშაჟის ეტაპი სტარტს 7 აგვისტოს, თბილისის დროით 13:45 საათზე აიღებს.
შეგახსენებთ, რომ ელიზბარ ოდიკაძემ ტოკიოს ოლიმპიადაზე 1/8-ფინალში ირანელი მოჰამადჰოსეინ მოჰამადიანი 6:3 დაამარცხა, ხოლო 1/4-ფინალში რუს აბდულრაშიდ სადულაევთან 0:10 წააგო.
