26-28 მარტს, თბილისში ძიუდოს გრანდ-სლემი გაიმართება. შეგახსენებთ, აღნიშნულ ტურნირს ძიუდოს საერთაშორისო ფედერაციამ სტატუსი აუმაღლა და ამიერიდან გაცილებით პრესტიჟული იქნება, ვიდრე აქამდე იყო.
რა თქმა უნდა, ასეთი დონის სპორტული ფორუმის უმაყურებლოდ ჩატარება ტურნირს თავისებურ დაღს დაასვამდა, არადა ამის საშიშროება ნამდვილად არსებობდა.
კარგია, რომ ეს ასე აღარ მოხდება და თბილისის გრანდ-სლემს გულშემატკივარები ეყოლება. ამის თაობაზე დღეს საკოორდინაციო საბჭოს სხდომის შემდეგ გახდა ცნობილი.
„მივიღეთ გადაწყვეტილება 26-28 მარტს, თბილისში დაგეგმილ ძიუდოს გრან-პრიზე გულშემატკივრები დაიშვან ყველანაირი რეგულაციების დაცვით. ტრიბუნებზე მაყურებელთა 30% დაიშვება“- აღნიშნა მთავრობის ადმინისტრაციის ხელმძღვანელმა ილია დარჩიაშვილმა.
ასევე, დღეს მთავრობის სხდომის დასრულების შემდეგ ცნობილი გახდა, რომ 9 საათის შემდეგ გადაადგილების შეზღუდვა არ იხსნება, თუმცა მატჩზე დამსწრები გულშემატკივრებისთვის გამონაკლისი იქნება დაშვებულით. თუ რა ფორმით შეძლებენ ქომაგები დასწრებას, ეს უახლოეს დღეებში გახდება ცნობილი.
