თბილისის „დინამომ“ რომ მორიგი მწვრთნელი შეიცვალა აღარავის უკვირს. ქართული ფეხბურთის ფლაგმანის გულშემატკივრებს ალბათ სათვალავიც კი აერიათ.
2019 წელს „დინამოსთან“ ერთად გაჩემპიონებული ჩისკო მუნიოსი კლუბიდან სამწვრთნელო ლიცენზიის არქონის გამო გაუშვეს, თუმცა ერთი წლის შემდეგ ისევ დააბრუნეს და ესპანელმა სლეციალისტმაც საქართველოს ჩემპიონის ტიტული მეორედ მოიგო.
ჩისკო „დინამოს“ ისევ დაემშვიდობა, თუმცა ამჯერად მიზეზი ისეთია ქვას რომ ხეთქავს. ესპანელი მწვრთნელი არც მეტი არც ნაკლები ინგლისურმა „უოტფორდმა“ მიიწვია და ასეთ წინადადებაზე უარის თქმა ნამდვილად ძნელი იქნებოდა.
მოკლედ, ჩისკომ წინ სერიოზული კარიერული ნაბიჯი კი გადადგა, მაგრამ თავად „უოტფორდის“ ფანებს ეს ამბავი დიდად არ ხიბლავთ. უფრო მეტიც – ისინი ჩისკოს მისვლას სოციალურ ქსელში უარყოფითად გამოეხმაურნენ.
„დინამო თბილისიდან ჩვენთან გადმოსვლა? გუნდში რომელიც პრემიერლიგაში აღზევებისთის იბრძვის? ეს უბრალოდ სასაცილოა“
„მისი გამოცდილება მხოლოდ სამოყვარულო ლიგაში მუშაობით შემოიფარგლება. აქედან გამომდინარე მივიღეთ უცნობი მწვრთნელი. ნამდვილად სასაცილო ამბავია“
„გვჭირდებოდა მწვრთნელი, რომელსაც ინგლისში მუშაობის გამოცდილება ექნებოდა“
„თავი რომ მოვიკლა რამდენი წამალი უნდა დავლიო“?
„მწვრთნელად მივიღეთ ყმაწვილი, რომელსაც ზურგს 11 მატჩიანი გამოცდილება უმაგრებს“
„ერთ-ერთი ყველაზე გამაოგნებელი და სასაცილო დანიშვნა, რაც კი ოდესმე მინახავს. უბრალოდ მრცხვენია“
„ვერაფერს ვიტყვით, ნამდვილად „სოლიდური“ არჩევანია“
ეს ნაწილია იმ გამოხმაურებებისა, რაც „უოტფორდის“ ქომაგებმა გამოთქვეს. ინგლისური კლუბი ჩემპიონშიპშია და პრემიერლიგაში აღზევების კარგი შანსი აქვს. ჩისკოს დებიუტი კი ახალ გუნდში 26 დეკემბერს „ნორვიჩთან“ საშინაო მატჩში შედგება.
