არახალი და ჩვეულებრივად ტრადიციად ქცეული ამბავია, რომ ამა თუ იმ მსხვილი ტურნირის წინ, ფეხბურთი იქნება ეს, კალათბურთი, რაგბი თუ სხვა რომელიმე სათამაშო სპორტის სახეობა, მთავარი ატრიბუტი – თასი სხვადასხვა ქვეყნებში მოგზაურობს.
ასე მოხდა ამჯერადაც. „ევრო 2020-ის“ თასი, რომელიც უეფას პირველი გენერალური მდივნის ანრი დელონეს სახელობისაა, ევროპულ ტურნეშია. შეგახსენებთ, სწორედ დელონს ეკუთვნის ფეხბურთში ევროპის ჩემპიონატის დაარსების იდეა, რომელიც 1960 წლიდან იმართება.
„ევრო 2020“-ის თასმა კი მოგზაურობა 20 აპრილს რომიდან დაიწყო, სადაც 11 ივნისს გახსნის მატჩი გაიმართება. ბუნებრივია, რომ ის კონტინენტის პირველობის ყველა მასპინძელ ქალაქს მოივლის.
მარადიული ქალაქიდან, თასმა ბუქარესტამდეც ჩააღწია, იქ სადაც ევროპის ჩემპიონატზე მოხვედრის შემთხვევაში საქართველოს ნაკრებს უნდა ეთამაშა. მისი პრეზენტაცია ბუქარესტის ნაციონალურ სტადიონზე გაიმართა, სადაც ჩემპიონატის ეგიდით ერთ-ერთი მატჩი მიმდინარეობდა.
რუმინეთის დედაქალაქში იმდენად ძლიერი ქარი ქროდა, რომ სტენდი, რომელზეც თასი იყო მოთავსებული წაიქცა და ძირს აღმოჩდნა. თასი არ დაზიანებულა, თუმცა უეფას ეს ამბავი გულზე ძალიან მოხვდა და მისი დაუყოვნებლივ ბუდაპეშტში გადატანა ბრძანა, არადა ბუქარესტში ის კიდევ რამდენიმე საათით უნდა დაეტოვებინათ და ერთ-ერთ სატელევიზიო შოუში მიეტანათ.
