ეროვნული ლიგის 31-ე ტურში “დინამო ბათუმი” სტუმრად აუტსაიდერ სამტრედიას დაუპირისპირდა და მინიმალური ანგარიშით 1:0 დამარცხდა.
აღსანიშნავია, რომ მთელი მე-2 ტაიმის განმავლობაში “დინამო ბათუმს” რიცხობრივი უპირატესობა ჰქონდა, რადგან “სამტრედიას” ფეხბურთელი პირველი ტაიმის ბოლოს გააძევეს უხეში თამაშის გამო.
“დინამომ” საგოლე მომენტები უფრო მეტი შექმნა. კარგი შანსი ფლამარიონ ჯოვინოს ჰქონდა, რომლის დარტყმა ბექა ქურდაძემ ეფექტურ ნახტომში მოიგერია. 45-ე წუთზე სამტრედიელთა ფეხბურთელმა გიორგი ახალაძემ მოედანი ნაადრევად დატოვა.
58-ე წუთზე საჯარიმოში გიორგი ფანცულაია წააქციეს და პენალტი დაინიშნა. ბურთთან თავად ფანცულაია მივიდა, მაგრამ ვერ გაიტანა. შესანიშნავი იყო ქურდაძე, რომელმაც გუნდი კიდევ ერთხელ გადაარჩინა. აჭარლებს 86-ე წუთზე მოგება მაინც შეეძლოთ. ცვლილებაზე შესულმა ლუკაშ გროცურეკმა გოლი გაიტანა, მაგრამ თამაშგარე მდგომარეობა დაფიქსირდა. 90-ე წუთზე კი სამტრედიამ გამარჯვების გოლი გაიტანა. ავთო ენდელაძემ ანატოლი მესიაჩენკო მოძებნა საჯარიმოში. მან გიული მანჯგალაძეს აუარა გვერდი და ზუსტად დაარტყა კარში.
გია გეგუჩაძის გუნდი შემდეგ ტურში 1 ნოემბერს “საბურთალოს” უმასპინძლებს. მანამდე კი 28 ოქტომბერს, საქართველოს თასის 1/4-ფინალში თბილისის “ლოკომოტივს” ესტუმრება.
სამტრედია შემდეგ ტურში 1 ნოემბერს, “ლოკომოტივს” სტუმრად დაუპირისპირდება.
