ავტორიტეტული ბრიტანული გამოცემა Sky Sport მეტად საინტერესო და ამავდროულად დამაინტრიგებელ ინფორმაციას ავრცელებს. ინგლისური მედიის მტკიცებით, მიმდინარე სეზონის კულმინაცია – ჩემპიონთა ლიგის ფინალი თურქეთის ნაცვლად, ნისლიან ალბიონზე, კერძოდ კი ბირმინგემში გაიმართება.
მიზეზი? ორივე ფინალისტი გუნდი ინგლისიდან არის და სხვა ქვეყანაში გადაფრენა, თან იქ გულშემატკივრების ჩასვლა-ჩამოსვლა კორონავირუსის რისკს გაზრდისო. როგორც ამბობენ, ამის წინააღმდეგი არც თავად „ჩელსი“ და „მანჩესტერ სიტი“ არიანო.
ჩვენი ინგლისელი კოლეგების თქმით, ბირმინგემული კლუბის „ასტონ-ვილას“ ბოსები უეფასთან მოლაპარაკებას აწარმოებენ და დადებითი კონტურებიც შეინიშნებაო. უფრო მეტიც – მოლაპარაკებები წარმატებით მიმდინარეობს.
ამ ეტაპზე უცნობია თავად თურქული მხარის პოზიცია. მათ ჯერ ოფიციალური განცხადება ამ საკითხზე არ გაუკეთებიათ.
შეგახსენებთ, სტამბოლს ჩემპიონთა ლიგის ფინალისთვის ჯერ კიდევ შარშან უნდა ემასპინძლა, თუმცა მაშინ პანდემიით გამოწვეული სირთულეების გამო უეფას ტურნირის ფორმატის სასწრაფოდ გადაწყობა მოუხდა და ფინალური ეტაპიც ლისაბონში გაიმართა.
ჩემპიონთა ლიგის 2020/2021 წლების სეზონის გადამწყვეტი მატჩი 29 მაისს უნდა გაიმართოს.
