საქართველოში მრავლად გვყავს სპორტსმენები, რომლებმაც წარმატებული სპორტული კარიერის შემდეგ ძალები პოლიტიკაში მოსინჯეს.
ზოგიერთი მათგანის პოლიტიკური მოღვაწეობა მეტ-ნაკლებად წარმატებულად ფასდება, ზოგიერთმა კი გარკვეული პერიოდის შემდეგ, კვლავ სპორტულ სამყაროში დაბრუნება არჩია.
„პრაიმსპორტმა“ თვალი გადაავლო ისტორიას და გთავაზობთ იმ სპორტსმენების სიას, რომლებმაც კარიერის დასრულების შემდეგ მოღვაწეობა პოლიტიკაში განაგრძეს. აქვე აღვნიშნავთ, რომ სია შესაძლოა არასრული იყოს.
1. კახა კალაძე
კახა კალაძე დამოუკიდებელი საქართველოს ისტორიაში ყველაზე ტიტულოვანი ფეხბურთელია. „მილანის“ შემადგენლობაში, კალაძემ ორჯერ მოახერხა „ჩემპიონთა ლიგის“ მოგება. ამის გარდა, ის საქართველოს იტალიის და უკრაინის ჩემპიონატის რამდენიმე გზის გამარჯვებულია. კალაძე იყო საქართველოს ნაკრების კაპიტანიც.
საფეხბურთო კარიერის დასრულების შემდეგ, ფეხბურთელი „ქართული ოცნება – დემოკრატიული საქართველოს“ პოლიტიკური საბჭოს წევრი გახდა. 2012 წლის საპარლამენტო არჩევნებში კალაძემ სამტრედიის მაჟორიტარად იყარა კენჭი. ამავდროულად, ფეხბურთელი საპარლამენტო სიის პირველ ნომრად იყო წარდგენილი.
არჩევნებში გამარჯვების შემდეგ, 2012-2017 წლებში ენერგეტიკის მინისტრის თანამდებობას იკავებდა. 2017 წლის მეორე ნახევარში კი თბილისის მერის არჩევნებში გაიმარჯვა. ამავდროულად, კალაძე „ქართული ოცნების“ გენერალური მდივანიცაა.
2. ლევან კობიაშვილი
ვეტერანი ფეხბურთელი, საქართველოს ნაკრებში ჩატარებული თამაშებით რეკორდსმენია. კობიაშვილმა ეროვნულ გუნდში ყველაზე მეტი, 100 თამაში ითამაშა. კარიერის დიდი ნაწილი მან გერმანიის ბუნდესლიგაში გაატარა. იგი ისეთ გუნდებში თამაშობდა, როგორებიცაა „ფრაიბურგი“, „შალკე“ და ბერლინის „ჰერტა“.
კობიაშვილმა კარიერა სწორედ ამ უკანასკნელში, 2014 წელს დაასრულა. 2015 წელს ის საქართველოს ფეხბურთის ფედერაციის პრეზიდენტად აირჩიეს. 2016 წელს „ქართული ოცნების“ მანდატით, საქართველოს მე-9 მოწვევის პარლამენტის წევრი გახდა, 2020 წელს კი ასევე „ქართული ოცნების“ მანდატით მე-10 მოწვევის პარლამენტში შევიდა.
3. მიხეილ ყაველაშვილი
ვეტერანი ფეხბურთელი სხვადასხვა დროის განმავლობაში საქართველოს, რუსეთის, ინგლისის და შვეიცარიის ჩემპიონატებში თამაშობდა.
2007 წელს ყაველაშვილმა ორგანიზაცია „ჩვენი ფეხბურთი“ დააფუძნა.
2016 წელს „ქართული ოცნების“ სახელით ფეხბურთელი მე-9 მოწვევის პარლამენტის წევრი გახდა და სპორტისა და ახალგაზრდულ საქმეთა კომიტეტის თავმჯდომარის თანამდებობა დაიკავა. თავის საქმიანობას ყაველაშვილი მე-10 მოწვევის პარლამენტშიც აგრძელებს.
4. ლერი ხაბელოვი
ლერი ხაბელოვი ერთ-ერთი ყველაზე ტიტულოვანი ქართველი სპორტსმენია. თავისუფალი სტილით ჭიდაობაში ხაბელოვი 5-ჯერ გახდა მსოფლიო ჩემპიონი (1985, 1987, 1990, 1991, 1993 წწ.) და 4-ჯერ მოახერხა ევროპის ჩემპიონატის მოგება (1985, 1987, 1988, 1992).
1988 წელს სეულის ოლიმპიურ თამაშებზე ხაბელოვი ბრინჯაოს მედლის პრიზიორი გახდა, 1992 წელს კი ბარსელონაში გამართულ ოლიმპიადაზე ოქროს მედალი მოიპოვა.
სპორტული კარიერის დასრულების შემდეგ, ხაბელოვი საქართველოს ეროვნული ოლიმპიური კომიტეტის ვიცე-პრეზიდენტი, 1998-2004 წლებში სპორტის სახელმწიფო დეპარტამენტის უფროსის პირველი მოადგილე, ხოლო 2004-2008 წლებში კი ოლიმპიური კომიტეტის პირველი ვიცე-პრეზიდენტი.
2012 წელს ლერი ხაბელოვი კოალიცია „ქართულმა ოცნებამ“ წარადგინა ქარელის ოლქის მაჟორიტარობის კანდიდატად. იგი დეპუტატი მე-9 მოწვევის პარლამენტშიც იყო, ახლა კი საქმიანობას ოლიმპიური კომიტეტის პრეზიდენტის პოსტზე განაგრძობს.
5. შოთა ხაბარელი
ყოფილი ძიუდოისტი 1980 წლის ოლიმპიური თამაშების გამარჯვებულია.
შოთა ხაბარელმა მნიშვნელოვან წარმატებას საქართველოს ძიუდოისტთა ნაკრების მწვრთნელობის დროსაც მიაღწია. იგი აღნიშნულ თანამდებობას 1987-1991 და 1997-2009 წლებში იკავებდა. სწორედ მისი მწვრთნელობის დროს გახდა ზურაბ ზვიადაური ოლიმპიური ჩემპიონი.
2002, 2003, 2006 და 2008 წლებში ხაბარელი ევროპის საუკეთესო მწვრთნელად დასახელდა.
2012 წელს ვეტერანი სპორტსმენი „ქართულ ოცნებას“ შეუერთდა და მე-8 მოწვევის პარლამენტის წევრი გახდა. 2016 წელს ხაბარელი მმართველი პარტიის მანდატით მეორედ შევიდა პარლამენტში, 2020 წლის საპარლამენტო არჩევნების შემდეგ კი იგი მე-10 მოწვევის პარლამენტის წევრი გახდა.
ამავდროულად, ის სპორტისა და ახალგაზრდულ საქმეთა კომიტეტის თავმჯდომარის მოადგილეა.
6. ზურაბ ზვიადაური
ზურაბ ზვიადაურს ქართული სპორტის ისტორიაში მნიშვნელოვანი ადგილი უკავია. ვეტერანი ძიუდოისტი დამოუკიდებელი საქართველოს ისტორიაში პირველი ოლიმპიური ჩემპიონია. ამ წარმატებას ზვიადაურმა 2004 წელს, ათენის ოლიმპიურ თამაშებზე მიაღწია.
2012 წელს ზვიადაური „ქართული ოცნების“ რიგებს შეურთდა და არჩევნებში ახმეტის მუნიციპალიტეტის მაჟორიტარ დეპუტატად აირჩიეს. 2012-2016 წლებში ვეტერანი ძიუდოისტი საქართველოს მე-8 მოწვევის პარლამენტის წევრი იყო.
7. გიორგი ასანიძე
ვეტერანი ძალოსანი ქართული სპორტის ისტორიაში ერთ-ერთი ყველაზე ტიტულოვანი სპორტსმენია. ასანიძემ 2004 წლის ოლიმპიადაზე ქართულ დელეგაციას მეორე ოქროს მედალი მოუტანა.
ამის გარდა, 2000 წლის სიდნეის ოლიმპიადაზე მან ბრინჯაოს მედალი მოიგო. ვეტერანი ძალოსანი მსოფლიოს 1-გზის და ევროპის 3-გზის ჩემპიონია.
სპორტული კარიერის დასრულების შემდეგ, ასანიძე საქართველოს მე-7 მოწვევის პარლამენტის წევრი იყო „ნაციონალური მოძრაობის“ მხრიდან. პარალელურად, ის სპორტისა და ახალგაზრდულ საქმეთა კომიტეტს ხელმძღვანელობდა.
2013 წელს ასანიძე სპორტში დაბრუნდა და საქართველოს ძალოსანთა ნაკრების მთავარ მწვრთნელად დაინიშნა. იგი ამ პოსტზე ამ დრომდე მუშაობს და საკმაოდ წარმატებულადაც.
8. ზაზა კედელაშვილი
ყოფილი ძიუდოისტი ევროპის 3-გზის ჩემპიონია. ამ წარმატებას კედელაშვილმა 2006, 2007 და 2008 წლებში მიაღწია. ძიუდოისტმა მონაწილეობა მიიღო 2008 წლის პეკინის ოლიმპიურ თამაშებზეც, თუმცა პირველივე რაუნდში დამარცხდა.
სპორტული კარიერის დასრულების შემდეგ კედელაშვილი „ნაციონალურ მოძრაობას“ შეუერთდა და 2012 წელს პარტიის სახელით მე-8 მოწვევის პარლამენტის წევრი გახდა.
2016 წლის საპარლამენტო არჩევნებში კედელაშვილმა კვლავ „ნაციონალური მოძრაობის“ სახელით იყარა კენჭი, 2017 წელს კი „ევროპული საქართველოს“ შეუერთდა და 2020 წლის ბოლომდე ამ პარტიის მანდატით სარგებლობდა
9. ირაკლი აბუსერიძე
ვეტერანი სპორტსმენი საქართველოს მორაგბეთა ეროვნული ნაკრების კაპიტანი იყო.
სპორტული კარიერის დასრულების შემდეგ, აბუსერიძე „ქართულ ოცნებას“ შეუერთდა და საქართველოს მე-9 მოწვევის პარლამენტის წევრი გახდა.
2020 წელს მან რაგბის კავშირის პრეზიდენტობის კანდიდატად იყარა კენჭი და გაიმარჯვა კიდეც. თუმცა, საჯარო რეესტრმა მას პრეზიდენტად რეგისტრაცია შეუჩერა.
10. ბიძინა გეგიძე
ბიძინა გეგიძე ყოფილი მორაგბე და საქართველოს მე-9 მოწვევის პარლამენტის წევრი იყო.
დეპუტატობამდე, გეგიძე 1995-2004 წლებში საქართველოს რაგბის კავშირის პრეზიდენტის თანამდებობას იკავებდა.
2002-2006 წლებში თბილისის საკრებულოს წევრიც იყო. ამასთან, არის პარტია „ახალი მემარჯვენეების“ და საზოგადოებრივი მოძრაობების – „დაიცავი საქართველოსა“ და „სახალხო პატრულის“ დამფუძნებელი.
11. თემურ ხუბულური
თენგიზ (თემურ) ხუბულური ვეტერანი ძიუდოისტია, რომელსაც თავის დროზე საერთაშორისო ასპარეზზე მნიშვნელოვან წარმატებებს მიაღწია. ხუბულური 2-ჯერ ევროპის, 2-ჯერ კი მსოფლიოს ჩემპიონატის გამარჯვებული გახდა. ამის გარდა, 1980 წლის ოლიმპიადაზე მან ვერცხლის მედალი მოიპოვა.
კარიერის დასრულების შემდეგ, ხუბულური ძიუდოისტთა ნაკრებს წვრთნიდა.
2012 წელს თენგიზ ხუბულური „ქართული ოცნების“ მანდატით მე-8 მოწვევის პარლამენტის წევრი გახდა, 2016 წელს კი ასევე მმართველი პარტიის რიგებში მე-9 მოწვევის პარლამენტის წევრად მოგვევლინა.
12. ლუკა კურტანიძე
ვეტერანი მოჭიდავე 5-გზის ევროპის და 2-გზის მსოფლიოს ჩემპიონია. მას მონაწილეობა აქვს მიღებული 1996, 2000 და 2004 წლების ოლიმპიადებზე, სადაც ორჯერ მოახერხა ბრინჯაოს მედლის მოგება.
2010 წლის 4 ივნისს ლუკა კურტანიძე ნინო ბურჯანაძის ოპოზიციურ პარტიას, „დემოკრატიული მოძრაობა – ერთიანი საქართველო“ შეუერთდა. მისი თქმით, პოლიტიკაში წასვლა სპორტის სფეროში ბევრი უსამართლობის ხილვამ გადააწყვეტინა.
მონაწილეობდა 2011 წლის მაისის ანტისამთავრობო აქციებში. როგორც მოგვიანებით ვანო მერაბიშვილის სასამართლო პროცესზე დაკითხვისას იხსენებდა, 26 მაისს მიტინგის დარბევისას ის სპეცდანიშნულების რაზმის ათამდე წევრმა დააკავა და სასტიკად სცემა.
2012 წელს შეუერთდა ბიძინა ივანიშვილის ოპოზიციურ კოალიცია „ქართულ ოცნებას“.
მისი სახელით ოქტომბრის საპარლამენტო არჩევნებში წარდგენილი იყო ლაგოდეხის მუნიციპალიტეტის მაჟორიტარ კანდიდატად, თუმცა „ერთიანი ნაციონალური მოძრაობის“ კანდიდატ გია გოზალიშვილთან წააგო.
2015 წლის თებერვალში კურტანიძე გახდა საქართველოს პარლამენტის წევრი გარდაცვლილი დეპუტატის, თამაზ ავდალიანის ნაცვლად.
2012 წლის დეკემბერში, ლუკა კურტანიძე საქართველოს ჭიდაობის ფედერაციის პრეზიდენტად აირჩიეს, თუმცა, 2014 წელს პრეზიდიუმმა ის თანამდებობიდან გადააყენა.
ამჟამად, კურტანიძე ჭიდაობის ეროვნული ფედერაციის ვიცე-პრეზიდენტია.
13. სოსო ჯაჭვლიანი
მსახიობის გარდა, სოსო ჯაჭვლიანს კარიერა სპორტში, კერძოდ კი მკლავჭიდში აქვს გატარებული. სპორტის ამ სახეობაში ჯაჭვლიანმა არაერთ წარმატებას მიაღწია.
ის გახლავთ საქართველოს მკლავჭიდის ფედერაციის პრეზიდენტი.
2012 წელს სოსო ჯაჭვლიანი „ქართულ ოცნება – დემოკრატიულ საქართველოს“ შეუერთდა და მე-8 მოწვევის პარლამენტის წევრი გახდა.
14. ვიქტორ სანიკიძე
ვიქტორ სანიკიძე ქართული კალათბურთის ისტორიაში ერთ-ერთი საუკეთესო მოთამაშეა. მან როგორც სანაკრებო, ისე საკლუბო დონეზე არაერთ წარმატებას მიაღწია.
„მფრინავ ვიქტორად“ წოდებული სანიკიძის გარეშე საქართველოს კალათბურთელთა ნაკრები ფაქტობრივად წარმოუდგენელი იყო. 2 წლის წინ მან პროფესიონალი კალათბურთელის კარიერა დაასრულა, 34 წლის ასაკში კი პოლიტიკაში წასვლა გადაწყვიტა.
2020 წელს სანიკიძე „ქართული ოცნების“ მანდატით მე-10 მოწვევის პარლამენტის წევრი გახდა.
15. დავით კაჭარავა
ქართული სპორტის ყველა გულშემატკივარს დავით კაჭარავას სახელი ერთხელ მაინც ექნება გაგონილი. 36 წლის ვეტერანი მორაგბე საქართველოს მორაგბეთა ნაკრების ისტორიაში, ერთ-ერთი საუკეთესო მექულეა. ასევე, ნაკრებში მან 122 შეხვედრა, რას ისტორიაში ერთ-ერთი უმაღლესი მაჩვენებელია.
მორაგბის კარიერა კაჭარავამ ზაფხულის მიწურულს დაასრულა, რამდენიმე დღეში კი „ქართული ოცნების“ საარჩევნო სიაში მოგვევლინა. დღეს ის მე-10 მოწვევის პარლამენტის წევრია.
16. მანუჩარ კვირკველია
მანუჩარ კვირკველია ბერძნულ-რომაული სტილით ჭიდაობაში 2008 წლის პეკინის ოლიმპიური თამაშების გამარჯვებული გახდა. სპორტული კარიერის დასრულების შემდეგ მან 2014 წელს ჭიდაობის ეროვნული ფერედაციის პრეზიდენტის პოსტი დაიკავა.
2020 წლის საპარლამენტო არჩევნებზე „ერთიანმა ნაციონალურმა მოძრაობამ“ და გაერთიანებულმა ოპოზიციამ „ძალა ერთობაშია“ ოზურგეთი-ლანჩხუთი-ჩოხატაურის საარჩევნო ოლქის მაჟორიტარობის კანდიდატად წარადგინა.
პროპორციული სიით ის მე-10 მოწვევის პარლამენტის წევრი გახდა, თუმცა ვეტერანმა სპორტსმენმა საკანონმდებლო ორგანოში შესვლაზე უარი განაცხადა.
