წყალი აღარ გაუვა, რომ 2021 წლის ავსტრალიის ღია პირველობას ახალი დედოფალი ეყოლება. ეს მას შემდეგ გაირკვა, რაც შარშანდელი ჩემპიონი სოფია კენინი ტურნირს მეორე წრიდან გამოეთიშა.
ამერიკელმა მეჩოგნემ, რომელიც მსოფლიოს მეოთხე ჩოგანია კაია კანეპის წინააღმდეგობა ვერ დაძლია და ორ სეტში – 3/6, 2/6 წააგო. ნიშანდობლივია, რომ ესტონელი ჩოგბურთელი კენინისთვის ერთგვარად უხერხულ მეტოქედ ყალიბდება. სოფიამ კანეპისთან უკვე მეორედ წააგო, თავად კი ჯერჯერობით დამარცხებული არ ჰყავს.
„ტურნირამდე ბევრი მეკითხებოდა შევძლებდი თუ არა ტიტულის დაცვას. ჩემი პასუხი იყო კი, მაგრამ გამოჩნდა, რომ სათანადოდ მზად არ ვყოფილვარ. პირველ რიგში, ფსიქოლოგიურად გამიჭირდა, რა თქმა უნდა გულდაწყვეტილი ვარ“ – თქვა სოფია კენინმა მატჩის შემდეგ.
მესამე წრეში კაია კანეპი ხორვატ დონა ვეკიჩს დაუპირისპირდება.
