ნიკოლოზ ბასილაშვილი მიუნხენის პრესტიჟული ტურნირის ნახევარფინალშია. შეგახსენებთ, ქართველი მეჩოგნე ტურნირზე მე-5 ნომრად არის განთესილი და თავის მეხუთე ATP-ის ტიტულამდე ორი ნაბიჯიღა აშორებს.
ბასილაშვილის შანსები კიდევ უფრო გაზარდა ტურნირის უმთავრესი ფავორიტის ალექსანდრე ზვერევის სენსაციურად გამოვარდნამაც. გერმანელმა ჩოგბურთელმა ყველასთვის მოულოდნელად ბელარუსი ივაშკას წინააღმდეგობა ვერ დაძლია.
დავუბრუნდეთ ისევ ჩვენებურ ჩოგბურთელს, რომელმაც ორ დღეზე გაწელილი მეოთხედფინალური დაპირისპირება თავის სასარგებლოდ დაასრულა. ბასილაშვილის მეტოქე სლოვაკი ნორბერტ გომბოში გახლდათ, რომელიც რეიტინგის 95-ე ნომერია.
ქართველი და სლოვაკი ჩოგბურთელების დაპირისპირება გუშინ წვიმის გამო შეწყდა. იმ დროისთვის ბასილაშვილი 5:4 იგებდა და საბოლოოდ ყველაფერი მისთვის და ქართველი გულშემატკივრებისთვის სასიკეთოთ დასრულდა. ნიკოლოზ ბასილაშვილმა ნორბერტ გომბოშს ორ სეტში, დამაჯერებლად და აუღელვებლად, ერთნაირი ანგარიშით – 6:4, 6:4 აჯობა.
ნახევარფინალში ნიკოლოზ ბასილაშვილის მეტოქე ნორვეგიელი კასპერ რუდი იქნება.
