დღეს, 15 ივლისს ჩემპიონთა ლიგის საკვალიფიკაციო ეტაპის საპასუხო მატჩში “გარგა” მონტენეგრულ “სუტიესკას” მიიღებს. მატჩის წინ ქართული გუნდის მწვრთნელმა გაგა კირკიტაძემ პრესკონფერენცია გამართა და ჟურნალისტებთან საინტერესო თემებზე ისაუბრა:
”ყველა ფეხბურთელი ჯანმრთელად და ფიზიკურად კარგ ფორმაში იმყოფება. ერთადერთი ფეხბურთელი, რომელიც გვაკლია, თორნიკე მუმლაძეა, მას ტრავმა პირველ მატჩამდეც ჰქონდა და ამ მიზეზით ვერ დაგვეხმარა.
ერთია, როცა მეტოქე თეორიული კუთხით იცი და მეორეა, როცა უშუალოდ მოედანზე ხედავ. პირველი შეხვედრის შემდეგ უკვე ვიცით როგორი გუნდია სუტიესკა.
მსგავსი ხასიათის შეხვედრებს სტრესი ახლავს, ამის მიზეზი კი ისაა, რომ ჩვენ მეორე ლიგას წარმოვადგენთ, გუნდის ნაწილს კი რანგით უმაღლეს ლიგაში თამაშის გამოცდილებაც კი არ აქვს. სწორედ სტრესის გამო ვერ შევძელით იმ მომენტების რეალიზება, რომელიც მონტენეგროში შევქმენით.
შანსებზე პროცენტული კუთხით ვერ ვისაუბრებ და აქცენტს არც მოლოდინებზე გავაკეთებ, თუმცა გულშემატკივარს ვეტყვი, რომ ბოლომდე დავიხარჯებით, მათი გახარება რომ შევძლოთ.
ფეხბურთი გულშემატკივრის სპორტია, იმედს ვიტოვებ, რომ გულშემატკივარი ჩვენს საგულშემატკივროდ მოვა და მხარს დაგვიჭერს.
კარგად ვიცი, გაგრა რა ღირებულებების მატარებელია და ვცდილობ, ეს ჩემმა ფეხბურთელემაც კარგად გაიაზრონ. საქართველოს წარმოვადგენთ და ეს დიდი პასუხისმგებლობაა.“- განაცხადა კირკიტაძემ
შეგახნსებეთ, რომ ამ გუნდებს შორის პირველი მატჩი 1:0 მონტენეგროელების გამარჯვებით დასრულდა. დღევანდელი მატჩი თბილისის დროით 20:00-ზე გაიმართება და მატჩის პირდაპირ რეპორტაჟს საზოგადოებრივი მაუწყებელი შემოგთავაზებთ.
