ამას წინათ, ფრანგი საჩოგბურთო მსაჯის შესახებ მოგითხრეთ, რომელიც ბუქმეიქერულ კანტორაში დაძვრებოდა და ფსონებს აკეთებდა. ბუნებრივია, ტოტალიზატორები იმიტომ არსებობს, რომ იქ ფსონი დადო, მაგრამ არა ყველამ. სპორტსმენებს, მწვრთნელებს, მსაჯებს ეს კატეგორიულად ეკრძალებათ, თუმცა ხშირად ცდუნებას ვერ უძლებენ.
ფრანგი არბიტრიც გამოიჭირეს და ეს ქმედება არ აპატიეს, თუმცა მისი სასჯელი უკრაინელ ჩოგბურთელ სტანისლავ პოპლავსკისთან ახლოსაც ვერ მივა. თუ ის მსაჯი საქმიანობას მხოლოდ 18 თვით ჩამოაშორეს, პოპლავსკის ჩოგნის ქნევა სამუდამოდ აუკრძალეს.
უკრაინელი სპორტსმენი ასეულის წევრი არ ყოფილა, მეტიც – ის ოთხასეულში იმყოფებოდა, თუმცა ATP-ის ტურის ტურნირებს ხშირად თამაშობდა და 2012 წელს მოსკოვის ფიუჩერსიც მოგებული აქვს.
პოპლავსკის მისამართით გამოყენებული მკაცრი ვერდიქტი იმით იყო განპირობებული, რომ ჩოგბურთელი ტოტალიზატორში ფულს თავდ კი არ დებდა, არამედ გარიგებულ მატჩებში იღებდა მონაწილეობას. ამ არასპორტულ და ყოველგვარ ზღვარგადასულ ქმედებას უკრაინელი მეჩოგნე 4 წლის მანძილზე (2014-2019) აკეთებდა და დიდი ალბათბით გვარიანი მაყუთიც ჩაიჯიბა, მაგრამ საბოლოოდ მაინც გამოიჭირეს. სამუდამო დისკვალიფიკაციასთან ერთად მას 10 ათასი დოლარის ოდენობით ჯარიმის გადახდაც დაეკისრა.
სტანისლავ პოპლავსკი ბრალს აღიარებს.
