მწვანე კონტინენტს მხოლოდ მიესალმა, ევროპაში კი იმედია გემრიელ გამარჯობას იტყვის. ნიკოლოზ ბასილაშვილი ბებერ კონტინენტს უბრუნდება და ძალებს მონპელიეს წარმომადგენლობით ტურნირზე მოსინჯავს, რომლის საპრიზო ფონდიც 262 170 ევროა.
მონპელიეს საჩოგბურთო ტურნირი შემადგენლობით ყოველთვის გამოირჩეოდა. იქ ჩასვლას მაღალი დონის მეჩოგნეები არასოდეს თაკილობდნენ და ასე იქნება ამჯერადაც.
მონპელიეში ჩოგანს გაიქნევენ ბელგიელი დევიდ გოფინი, ესპანელი რობერტო ბაუტისტა-აგუტი, ფრანგი უგო უმბერი, იტალიელი იანიკ სინერი, სერბი დუშან ლაიოვოჩი, გერმანელი ლენარტ შტრუფი და სხვები. ამ კომპანიაში იქნება ნიკოლოზ ბასილაშვილიც, რომელიც წელიწადზე მეტია რეგრესს განიცდის და საკუთარ აჩრდილს ჰგავს.
ქართველი ჩოგბურთელი ამჯერად რეიტინგის მე-40 ნომერია, ხოლო მონპელიეში მეცხრე განთესვა ექნება. ტურნირის მოქმედი ჩემპიონი ფრანგი გაელ მონფისია. ქართველმა ჩოგბურთელმა მონპელიეს შეჯიბრზე ბოლოს 2016 წელს ითამაშა, თუმცა თავი დიდად ვერ გამოიჩინა და სასტარტო ეტაპზევე მასპინძელ კენი დე შეპერთან წააგო.
მონპელიეს ტურნირი 22-28 თებერვალს გაიმართება და იმედია ნიკოლოზ ბასილაშვილისთვის წარმატებული გამოდგება.
