ჩემპიონთა ლიგის პლეიოფების პარალელურად, ლა-ლიგაში პირველი ტურის გადადებული მატჩი გაიმართა, რომელშიც „ბარსელონამ“ შინაურ არენაში „ელჩეს“ უმასპინძლა და 3:0 დაამარცხა.
ერთი კვირის წინ, ნოუ კამპზე „პსჟ„-სთან შერცხვენის შემდეგ, სადაც კატალონიურმა გუნდმა ფრანგულ გრანდთან 1:4 წააგო, რონალდ კუმანს და მის შეგირდებს გულშემატკივრების თვალში რეაბილიტაცია ნამდვილას ესაჭიროებოდათ.
ბუნებრივია, შედეგით კმაყოფილი დარჩა „ბლაუგრანას“ დამრიგებელი რონალდ კუმანი.
„ეს მოგება სატურნირო თვალსაზრისის გარდა, ფსიქოლოგიურადაც გვჭირდებოდა. ხასიათი ნადმვილად გამოგვიკეთდა და ვეცდებით გულშემატკივრები ხშირად გავახაროთ.
სეზონი ხანგრძლივი და მომქანცველია. ამიტომაც, ფეხბურთელები ხშირად იღლებიან და როტაცია აუცილებლობას წარმოადგენს.
შედეგით კმაყოფილი ვარ, რადგან მთავარ მიზანს მივაღწიეთ და 3 ქულა ავიღეთ, მაგრამ პირველი ტაიმით შედარებით იმედგაცრუებული დავრჩი. კარგია, რომ სიტუაცია მეორე ნახევარში გამოვასწორეთ.
ლიონელ მესიზე კი იმას ვიტყვი, რომ მან კიდევ ერთხელ დაამტკიცა თუ რაოდენ ფასეული და ღირებული ფეხბურთელია ჩვენთვის“ – აღნიშნა რონალდ კუმანმა.
„ბარსელონას“, 24 ტურის შემდეგ 50 ქულა და ლიდერ „ატლეტიკოს“ ხუთით ჩამორჩება.
