არა მხოლოდ „რეალის“ და „ბარსელონას“, ზოგადად მილიონობით ფეხბურთის გულშემატკივართა ინტერესი მადრიდისკენ იყო მიმართული, სადაც მორიგი ელ-კლასიკო შედგა. სამეფო გუნდმა, თავსხმა წვიმაში მოსისხლე მტრის – კატალონიური გრანდის დამარცხება დაძაბულ ბრძოლაში – 2:1 შეძლო.
ამ მარცხით, „ბლაუგრანა“ 65 ქულით სატურნირო ცხრილში მესამე ადგილამდე ჩამოქვეითდა, ხოლო „რეალს“ ერთით მეტი დაუგროვდა და დროებით გალიდერდა. მადრიდელთაგან გოლები ქარიმ ბენზემამ და ტონი კროოსმა გაიტანეს, ხოლო სტუმართაგან ანგარიში მინგუეზამ შეამცირა.
მატჩის შემდეგ გაცეცხლებული იყო „ბარსელონას“ დამრიგებელი რონალდ კუმანი, რომელმაც მთავარი არბიტრი მწვავედ გააკრიტიკა.
„პირველ ტაიმში საშინლად ვითამაშეთ, თუმცა მეორე ნახევარში მდგომარეობა გამოვასწორეთ. მარცხს ნამდვილად არ ვიმსახურებდით.
მსაჯზე იმიტომ გავბრაზდი, რომ არასწორი გადაწყვეტილებები მიიღო. თამაშს მხოლოდ 4 წუთი დაამატა, არადა ეს დრო და მეტი მხოლოდ მისი ყურსასმენების მოწესრიგებას დასჭირდა.
და პენალტის ეპიზოდი? მენდიზე აშკარა წესების დარღვევა იყო. მასაც ამას ვთხოვდი, რომ სიტუაცია სწორად შეეფასებინა. ახლა რა უნდა ვქნათ? მოვკეტოთ და შევეგუოთ. სხვა რა გზაა. არ ვიცი, რატომ არ იყენებენ ესპანეთში VAR-ის სისტემას“ – აღნიშნა რონალდ კუმანმა.
