2021 წლის ავსტრალიის ღია პირველობა რომ ნოვაკ ჯოკოვიჩის ტრიუმფით დასრულდა ჩოგბურთის ქომაგები ძალიან კარგად უწყიან. წესით ისიც ეცოდინებათ, რომ ნოლე მელბურნის მეიჯორის აბსოლუტური რეკორდსმენია. სერბს მწვანე კონტინენტზე 9-ჯერ უჩემპიონია.
როლან გაროსი კი ჯოკოვიჩს მხოლოდ ერთხელ აქვს მოგებული. იქაურობის ბატონ-პატრონი ხომ რაფაელ ნადალია, რომელიც საფრანგეთის ღია პირველობის მოქმედი ჩემპიონია. ესპანელმა მატადორმა, 2020 წლის ფინალში ჯოკოვიჩი კორტიდან გააქრო.
ნოლეს მწვრთნელი გორან ივანიშევიჩი როლან გაროსის შარშანდელ ფინალს იხსენებს და იმ მიზეზებზე საუბრობა, რამაც ჯოკოვიჩის მარცხი განაპირობა.
„ნოვაკისთვის ყოველთვის მნიშვნელოვანია თუ რამდენად კარგად არის მზად ფიზიკურად, რადგან საჩოგბურთო ოსტატობა რომ არ დაეწუნება ყველამ ვიცით. ნოლე თუ აგებს მხოლოდ მაშინ, როდესაც თავს ფიზიკურად სათანადოდ კარგად ვერ გრძნობს.
როლან გაროსის შარშანდელ ფინალში მას ყველა ასპექტში ეტყობოდა, რომ იმ დღეს გამძლეობაში მოიკოჭლებდა. ის არ იყო მზად, საჭიროების შემთხვევაში ვთქვათ კორტზე 15 საათი გაეტარებინა, მაშინ როდესაც წლევანდელი ავსტრალიის ღია პირველობის ფინალში დანილ მედვედევთან თუნდაც 30 საათს ითამაშებდა.
რაფას წინააღმდეგ დაპირისპირებისას, ნოვაკისთვის უმთავრესი ფაქტორი სწორედ ფიზიკური კონდიციებია“ – აღნიშნავს გორან ივანიშევიჩი.
