ტოკიოში მიმდინარე ზაფხულის ოლიმპიურ თამაშებზე ქართულმა დელეგაციამ პირველი მედალი მოიპოვა.
ძიუდოში, 66 კგ წონით კატეგორიაში მოასპარეზე ვაჟა მარგველაშვილი ვერცხლის მედლის მფლობელი გახდა. ქართველი ფალავანი ფინალში იაპონელ ჰაფუმი აბესთან ვაზარით დამარცხდა, თუმცა მოპოვებული მედალი რა თქმა უნდა წარმატებულად უნდა შეფასდეს.
27 წლის ძიუდოისტის წარმატების შემდეგ, საქართველოს ნაკრების მთავარმა მწვრთნელმა, ლაშა გუჯეჯიანმა მცირე კომენტარი გააკეთა და მარგველაშვილის გამოსვლა შეაფასა. გუჯეჯიანის სიტყვებს სპორტული მედიცინის ასოციაციის Facebook-გვერდი ავრცელებს.
„დამთავრდა ოლიმპიური თამაშების მეორე დღე ძიუდოისთვის და როგორც მოგეხსენებათ ვერცხლის მედალი ავიღეთ. რა თქმა უნდა, ეს წარმატებაა. ვულოცავ ვაჟა მარგველაშვილს ამ წარმატებას, ასევე ვულოცავ სრულიად დელეგაციას, საქართველოს, ძიუდოს გულშემატკივრებს და საქართველოს ნაკრებს. გულის სიღრმეში რა თქმა უნდა დამრჩა ის განცდა და დაუკმაყოფილებლობის გრძნობა, რასაც ჰქვია ოქროს მედლის შანსის დაკარგვა. ვფიქრობ, რომ დარჩენილ დღეებში ქართველი ძიუდოისტები წარმატებით იასპარეზებენ და ოქროს მედლებსაც ავიღებთ“, – განაცხადა ლაშა გუჯეჯიანმა.
შეგახსენებთ, რომ ხვალ ძიუდოს ტურნირზე საქართველოს სახელით ლაშა შავდათუაშვილი და ეთერ ლიპარტელიანი იასპარეზებენ.
