ჩემპიონთა ლიგის ნახევარფინალში მადრიდის „რეალი“ ლონდონის „ჩელსისთან“ რომ პირწმინდად დამარცხდა არახალი ამბავია. სამეფო გუნდის ქომაგები ამ წაგებით ისედაც გაღიზიანებულები იყვნენ, როდესაც ედენ აზარმა ცეცხლზე ნავთი დაასხა.
ბელგიელმა ფეხბურთელმა მატჩის შემდეგ ყოფილ თანაგუნდელებთან იხალისა და იცინოდა. კამერებმა ეს თვალნათლივ დააფიქსირა, რის გამოც აზარი სამეფო გუნდის ქომაგების კრიტიკის ობიექტი გახდა.
„მას ალბათ კარგად არ აქვს გათავისებული თუ რომელ გუნდში თამაშობს“. „ედენ აზარს ალბათ რეალი საერთოდ არ აინტერესებს“. მსგავსი და გაცილებით მწვავე ტიპის კომენტარებს სოციალურ ქსელში ხშირად წააწყდებით.
ედენ აზარი იძულებული გახდა საჯარო განცხადება გაეკეთებინა და ბოდიში მოეხადა.
„რეალში თამაში ყოველთვის იყო ჩემი ოცნება. აქ მხოლოდ მოსაგებად და უმაღლესი მწვერვალების დასაპყრობად მოვედი. დღეს ჩემზე არაერთი აზრი მოვისმინე, ძირითადად კრიტიკული. ძალიან ვწუხვარ და ბოდიშს ვიხდი. ჩემი მიზანი რეალის ქომაგების განაწყენება არ ყოფილა“ – ამბობს ედენ აზარი.
