საქართველოს მორაგბეთა ეროვნული ნაკრები რაგბი ევროპის ჩემპიონატის 2021 წლის სეზონის პირველი მატჩისთვის ემზადება. ბოჯღალოსნები მოსამზადებელ ეტაპს ლისაბონში გადიან და 6 მარტს, ადგილობრივ ნაკრებს შეერკინებიან.
ჩვენს გუნდში სამი დებიუტანტი იქნება – გია ხარაიშვილი, ირაკლი ცხადაძე და გიორგი ბაბუნაშვილი.
ბორჯღალოსნებმა მოახლოებულ მატჩზე და სამზადისზე რაგბის კავშირის პრესსამსახურთან ისაუბრეს:
„პორტუგალიასთნ თამაშისთვის ვემზადებით 100%-ით როგორც ფიზიკურად, ისე ტაქტიკურად. პირობებიც ხელს გვიწყობს, კარგი ბაზა და მოედანია. პორტუგალიასთან ჩემი პირველი თამაშია და როგორც ყველა მატჩი, ესეც საპასუხისმგებლო და მნიშვნელოვანია“, – ამბობს თორნიკე ჯალაღონია.
„პორტუგალიასთან მატჩისთვის სრული დატვირთვით ვემზადებით. ყველას გვსურს, რომ წინა თამაშზე რა შეცდომებიც დავუშვით, გამოვასწოროთ და კარგი თამაში ვაჩვენოთ. რა თქმა უნდა უნდა გავიმარჯვოთ. რაც შეეხება ჩემს დებიუტს, ძალიან ბედნიერი ვარ. ამ მომენტს დიდხანს ველოდი. მაქსიმალურად შევეცდები, რომ საკუთარი თავი არ დავზოგო“, – განაცხადა ირაკლი ცხადაძემ, რომელიც შაბათს „ბორჯღალოსნების“ მთავარი გუნდის მაისურს პირველად მოირგებს.
პორტუგალიისა და საქართველოს ნაკრებების სარაგბო დაპირისპირება შაბათს, 6 მარტს, თბილისის დროით 19:00 საათზე დაიწყება.
