ყოჩაღი ზღვისპირელები და მოგებას დანატრებული თელავი

ეროვნული ლიგის მეცხრე ტურის დასკვნითი სათამაშო დღე შეიძლება ითქვას, რომ ერთგვარად აუტსაიდერთა დაპირისპირებით გაიხსნა.

ქობულეთის „შუქურამ“ ზესტაფონში „თელავს“ უმასპინძლა და უმნიშვნელოვანესი 3 ქულაც მოიპოვა. კახური გუნდი უკვე მიჯრით მესამე თამაშს აგებს და თავიც რთულ ვითარებაში ჩაიგდო. „თელავი“ 6 ქულით მერვე ადგილზეა და უკვე გასავარდნ ზონაშია, თუმცა ისიც სათქმელია, რომ ჯერ ჩემპიონატის დასრულებამდე დიდი დროა.

თელაველებმა პირველ ტურში „სამტრედიის“ დამარცხების შემდეგ აგერ უკვე ზედიზედ 6 თამაშია გამარჯვების გემო არ იციან, ხოლო „შუქურა“ ამ მხრივ უფრო ყოჩაღად გამოიყურება.

მატჩი ძალზედ დუნედ და უინტერესოდ მიმდინარეობდა და თითქოს გუნდები ნულოვანი ფრით უნდა გაყროდნენ, თუმცა 76 წუთზე მიხეილ სარდალიშვილმა ოსტატურად ითამაშა და საჯარიმოს ხაზიდან ძლიერად გაისროლა. თელაველთა კიპერმა ჩოჩიშვილმა თავისი გუნდის გადარჩენა ვერ შეძლო. მალე კი თავი ზღვისპირელთა ბრაზილიელმა ლეგიონერმა ჯეფერსონ ალმეიდამ გამოიჩინა და „შუქურამაც“ 2:0 იმარჯვა.