საქართველოს კალათბურთის ფედერაციის პრეზიდენტობისთვის პაატა გურასპაულიც იბრძოლებს. ინფორმაცია ფედერაციის Facebook-გვერდზე გავრცელდა. მოქმედი პრეზიდენტის კანდიდატურა თბილისის კალათბურთის განვითარების კავშირმა წარადგინა.
„ფედერაციის მოქმედი პრეზიდენტი, პაატა გურასპაული საქართველოს კალათბურთის ეროვნული ფედერაციის საპრეზიდენტო არჩევნებში მონაწილეობის მისაღებად დარეგისტრირდა.
საქართველოს კალათბურთის ეროვნულმა ფედერაციამ დღეს, 1 დეკემბერს, სრულუფლებიანი ხმის უფლების მქონე წევრის – თბილისის კალათბურთის განვითარების კავშირის წარდგინებით, ფედერაციის საპრეზიდენტო არჩევნებში მონაწილე კანდიდატის დარეგისტრირების შესახებ განცხადება მიიღო.“ – ნათქვამია განცხადებაში.
შეგახსენებთ, რომ პაატა გურასპაულის გარდა საპრეზიდენტო კანდიდატად ვეტარანი კალათბურთელი და პარლამენტის წევრი, ვიქტორ სანიკიძეც დარეგისტრირდა. საარჩევნო ყრილობა 11 დეკემბერს, სასტუმრო „ქორთიარდ მარიოტში“ გაიმართება.
