საქართველოში კოკაის, ტოჩინოშინის, გაგამარუს დამსახურებით ყველამ იცის, თუ რა არის დოჰიო, მავაში, ცუპარები და ა.შ. პირველი ევროპელი და ქართველი სუმოისტი, რომელმაც ელიტარულ დივიზიონში შეაღწია ლევან ცაგურია (კოკაი) იყო. ქართველებს კოკაის გარდა, როგორც ზემოთ აღვნიშნე კიდევ ორი გამორჩეული სუმოისტი – ლევან გორგაძე (ტოჩინოშინი) და უკვე ვეტერანი თეიმურაზ ჯუღელი (გაგამარუ) ჰყავს.
ლევანი 2018 წელს იმპერატორის თასის მფლობელი გახდა, რაც ჯერჯერობით ვერცერთმა ქართველმა ვერ შეძლო. ამასთან, ტოჩინოშინი ოძეკის წოდების მფლობელიც გახდა, რაც ასევე ქართველებს შორის საუკეთესო მაჩვენებელია. მოგეხსენებათ, ოძეკობიდან იოკუძუნამდე ერთი ნაბიჯია, თუმცა გახშირებული ტრავმების გამო ლევანი აღნიშნულ ტიტულს ვერ დაეუფლა.
რაც შეეხება გაგამარუს, აწ უკვე ვეტერანმა სუმოისტმა საუკეთესო შედეგი 2012 წელს დააფიქსირა, როდესაც კომუსუბის წოდებას დაეუფლა. ლევანის მსგავსად, თეიმურაზ ჯუღელსაც ტრავმები აწუხებდა, რის გამოც თავისი შესაძლებლობების მაქსიმუმის გამოვლენა ვეღარ შეძლო. გაგამარუმ ერთი წლის წინ პროფესიონალური კარიერაც დაასრულა.
მოგეხსენებათ „პრაიმ სპორტი“ ხშირად გიყვებათ საზოგადოებისთვის ცნობად, თუ ნახევრად ცნობად სპორტსმენებზე, ამჯერად კი 23 წლის ქართველ სუმოისტს, ბადრი ხატისკაცს გაგაცნობთ.
ბადრიმ აქტიური სპორტული კარიერა თავდაპირველად ძიუდოში დაიწყო, 15 წლის ასაკში კი ძალების მოსინჯვა სუმოში გადაწყვიტა რაც საკმაოდ კარგად გამოუვიდა. გორელი სპორტსმენი 21-წლამდელებს შორის ევროპის ჩემპიონი გახდა, 23-წლამდელებში კოკაის საერთაშორისო ტურნირი მოიგო, ტალინში ჭაბუკებს შორის ევროპის ჩემპიონობა იზეიმა და ა.შ. რამდენიმე დღის წინ, გორელი სუმოისტმა, ევროპის თასის გათამაშებაც მოიგო.
„პრაიმ სპორტის“ მკითხველს სწორედ, ბადრი ხატისკაცის ინტერვიუს შევთავაზებთ. ქართველმა სუმოისტმა ჩვენთან თავის ამჟამინდელ წარმატებაზე, სუმოში პირველ ნაბიჯებსა და სამომავლო მიზნებზე ისაუბრა. მისი მთავარი მიზანი იაპონიაში პროფესიონალურ სუმოში კარიერის გაგრძელება და სუმოს ყველაზე მაღალი წოდების – იოკუძუნას მოპოვებაა:
– პირველ რიგში გილოცავთ ჩემპიონობას! როგორ შეაფასებდით ევროპის თასზე გამოსვლას?
– შედეგით კმაყოფილი ვარ. ეს წელი გამარჯვებით დავიწყე და იმედია ამ სეზონში წარმატებული შედეგები მექნება. წინ დიდი ტურნირებია და ვეცდები საქართველო საერთაშორისო ასპარეზზე ვასახელო.
– როგორ ფიქრობ, ფინალში მეტოქეს რის ხარჯზე აჯობე?
– ფინალურ შეხვედრაში ჩემი მეტოქე ამირან წიქორიძე გახლდათ. მისი ჭიდაობა ჩემთვის უცხო არ იყო, რადგან ერთმანეთს ევროპისა და მსოფლიოს ჩემპიონატებზე ბევრჯერ შევხვედრილვართ.
– ფინალამდე რა გზა გაიარეთ?
– ფინალურ შეხვედრამდე ძალიან გამოცდილი ესტონელი და ნორვეგიელი სპორტსმენები დავამარცხე. ნახევარფინალში ბულგარელ სუმოისტთან ძალიან გამიჭირდა, მაგრამ შედეგი მაინც დავდე.
– შემართება როგორი იყო?
– რა თქმა უნდა საბძოლო… ყველა შეხვედრის წინ კარგ განწყობას ვიქმნი და დასახულ მიზანს ვაღწევ. ფინალს რაც შეეხება, ძალიან რთული შეხვედრა იყო, მაგრამ გავიმარჯვე და ჩემპიონი გავხდი.
– როგორ ფიქრობ, რას ნიშნავს იყო ევროპის თასის გამარჯვებული?
– ყველა მოგებული ტურნირი ჩემთვის ძალიან მნიშვნელოვანია. როგორც აღვნიშნე, ყველა შეხვედრაზე საჩემპიონო განწყობით გავდივარ.
– თქვენს წარმატებაში მთავარი წვლილი ვის მიუძღვის?
– ჩემს პირად მწვრთნელს, მერაბ პაიჭაძეს, ზურა აქუბარდიას და ავთო ცერცვაძეს. ასევე, ჩემს ოჯახს აღნიშნულ წარმატებაში დიდი წვლილი მიუძღვის.
– რა არის ყველაზე მნიშვნელოვანი ქართული თვისება, რაც სუმოში გამარჯვებაში გეხმარებათ?
– ბრძოლის დროს შემართება და დამარცხებული მეტოქის პატივისცემა.
– სუმოში პირველ ნაბიჯებს როგორ გაიხსენებდით?
– 12 წლისას მამაჩემმა ძიუდოზე მიმიყვანა, რის შემდეგაც 15 წლისას გადავწყვიტე კარიერა სუმოში გამეგრძელებინა. პირველი ნაბიჯები საკმაოდ ნაყოფიერი გამოდგა. 16-წლამდელთა შორის ესტონეთის დედაქალაქ ტალინში ევროპის ჩემპიონატის ვერცხლის პრიზიორი გავხდი.
– ქართველ გულშემატკივარს რომ განუმარტო, რა არის სუმო და რით განსხვავდება ნებისმიერი სხვა ჭიდაობისგან?
– სუმო მეტია ვიდრე სპორტი… სუმო მრავალფეროვანი ჭიდაობის სახეობაა და ბევრი ილეთის გამოყენებაა შესაძლებელი, როგორც ძიუდოსი, ასევე თავისუფალი ჭიდაობისაც.
– რატომ აირჩიე სუმო და არა სხვა სპორტის სახეობა?
– ჩემი მეგობარი, გიგა გელაშვილი სუმოში მოღვაწეობდა და გარკვეული წარმატებებიც ჰქონდა ევროპის და მსოფლიოს ჩემპიონატებზე. მისი თხოვნით და ჩემი მონდომებით დავინტერესდი ამ სპორტის სახეობით და 2015 წლიდან სუმოში აქტიურად ვარ ჩართული.
– რას იტყოდი ტოჩინოშინზე?
– ყველა სუმოისტისთვის მისაბაძი პიროვნებაა. ის ქართველ სუმოისტებს ყოველთვის გვამხნევებს და შეჯიბრის წინ დიდ მოტივაციას გვაძლევს.
– რა არის თქვენი კარიერული მიზანი?
– მსურს პროფესიონალური კარიერა იაპონიაში გავაგრძელო. მთავარი ოცნებაა, რომ იოკოძუნა გავხდე და მთელ იაპონიას საქართველო გავაცნო.